喺香港可以去邊度學德文呢?我曾經喺歌德學院(有啲似英國文化協會同類)讀過兩三年,覺得佢係最好嘅。 https://www.goethe.de/ins/cn/en/sta/hon/kur/all.html 另外有啲同學仔去過HKU Space,中大同浸會校外課程讀過,佢哋冇咁多堂,而且一讀就要一段較長嘅時間,所以我最後都係建議去歌德學院讀。佢哋有德國人同中國人老師,我建議揀德國人老師,就算當識番個德國人都好呀!另外如果想去德國讀一個短嘅課程,大家可以去呢個網址: https://www.goethe.de/ins/de/en/kur.html 歌得學院喺德國幾個城市都有短期課程,佢有一至八個星期不等嘅課程,通常最受歡迎嘅都係兩個禮拜。我都曾經去過一次(Intensive 2),有唔同程度課程,一開始要有個placement test 幫你分班,但因為人太少,所以一班入邊嘅程度都有幾大分別。當時仲有Rothenburg分校,我選擇住佢嘅住宿(我被安排到去民宿,三層樓最高嗰層有兩間房,分別我同另一個瑞士女同學仔住,共用同一個沖涼房同廁所,下兩層係主人自己一家人住,基本上我兩個禮拜都撞唔到佢哋),再加埋學費大概幾百歐,可以早兩三個月前book定。其實我揀嘅課程只有上晝上堂,下晝其實係自由活動時間(i.e.即係冇嘢做),所以通常同同學仔一齊周圍去玩,星期六日有時學校會有課外活動,如行山。如果冇嘅話我曾經試過跟當地人去行山,全部都係公公婆婆,佢哋個個健步如飛,熱烈拍手歡迎我哋兩個華人後生女加入!佢哋原來行得快過我,最搞笑係佢地仲成日問我行唔行得到^_^!記得學校搞嗰次行山一行幾十人唔同國籍嘅同學仔一齊行,一度講一度笑,最記得有個西班牙嘅女人聽到我住二十幾樓已經嚇死左,我心諗我都未講大把人住四十幾樓!而當我見到一大片草地興奮不已嘅時候,佢哋反而反晒白眼。。。心諗我屋企係西班牙時周圍都係草地啦,有乜咁開心呢?!真係文化交流。講返上堂其實喺德國上堂係比較輕鬆嘅,因為大家都抱着半去旅行嘅狀態,又可以唔駛考試,而且同學通常都係返緊工嘅人,所以都比較輕鬆,但係就冇咁填鴨式學到咁多野囉,但係我覺得都好值得推介試試。我嗰時嗰班只係得十個人左右,得我一個香港人同另一個台灣女人,所以好自然我哋一齊玩。另外仲有啲歐洲人同美國人,佢哋年紀有啲較大,係叔叔嬸嬸,佢哋比較有錢,成日見佢哋去高級餐廳食飯又飲酒又吹水,好中產,唔係幾騷當年既我哋玩。在我而言,係一個好值得去既trip!^_^