最近有人問我有冇食過茶木既厚多士,然後佢問我:你一個人食得晒咩? 那一瞬間,醍醐灌頂。係喎,一個人都可以柯打呢個架喎。我對自己stereotype左茶木的形象感到非常羞愧,我既思想原來係咁狹隘咁陳腐咁世俗,我開始反思一個人可以做既事: 一個人去遊樂場 朋友讀書既時候係某主題樂園既會員,一年內去左十一次,裡面雖然有超過5次係同我去(我真係一個閑人),又有幾次係同人地去,餘下既一兩次,係佢自己一個去。據說會員係生日月份入場會被別上一個生日之星襟章,戴住襟章在樂園走動,園內每個職員都會為你送上生日祝福。朋友就咁在一片恭祝你福壽與天齊既賀聲環繞下兜左個圈,然後返左屋企。 「好爽。感覺今日我大晒。」她說。 「你係咪好想講免禮平身同有賞。」我問。 「直頭想大赦天下添啦。」我今晚做女王~ 海洋公園除左免費入場,有冇呢個service? 有既話我都一個人想去,係一片恭維聲中宣佈朕定今日為公眾假期。 一個人的生日能令大家有假放,對社會係幾咁有意義。 一個人遠足 讀書的時候曾經一個人上比叡山。其實一個人行山係幾危險,不過我完全冇考慮過呢點,事前只做左半個鐘research,著住帆船鞋,袋住一個麵包一小支水上山去了。就是那麼隨性(求其)。 上山的路叫東海自然步道,之前我從未行過山,一廂情願以為東海自然步道大概同香港既家樂徑差唔多,行左一陣先知係咁: 我去緊邊? 上山係要去山頂既延曆寺。去神社同寺廟最好一個人,一個人去先可以感受到謐靜。係大殿靜坐冥想,合埋眼,熄左燈,一個人兩個人都一樣。 我應該只行左比叡山-比叡山頂一段,其實路程好短,冇想像中辛苦。下次可以由高雄行去保津峽,我會帶支大D既水。 P.S. 之後google先知其實麥理浩徑都係差唔多架咋,傻仔。 一個人唱K 我唔係冇諗過咁做,事實上亦都有人咁做,例如我另一個朋友。有時候無所事事,興之所至,開返間房開演唱會,唱咩歌,唱得幾難聽都free過carefree。 不過好攰。又要點歌又要唱歌又飲野又食野又按0字去服務台,千手觀音都接唔住。Multi-tasking又唱又跳一兩個鐘,非常demanding。唱前食飽,準備song list同rundown,唔駛去紅館,係旺角你都係今晚既主角。 我既疑問只有一個:係咪要拎埋個袋去廁所? P.S. 寫之前我有search過, 真係有人係yahoo知識問...唔知有冇人問過曹博士/Master Joe... 一個人BBQ 農曆七月,一個月黑風高既晚上,一個長髮女子,拎住一個百佳袋,一袋炭,來到長洲東堤小築... 一個人可以做既野點止上面咁少。一個人睇戲一個人睇書一個人做運動一個人去旅行一個人放假...如果有一天可以一個人繁殖的話請通知我。我能單細胞分裂的話會是世紀大災難...哈哈哈哈哈哈哈 By 下次會同世上另一個我去食茶木厚多士既真宵