‧2017.12.31 (SUN)‧ DAY2~Rovaniemi見聖誕老人篇 芬蘭跨年追尋北極光10天の旅 * * * * * * * * * * * * * * * 食: 早餐: McDonald's @ Rovaniemi 午餐: 不知不覺SKIP左 晚餐: Restaurant Nili (***超讚的餐廳, 要預早BOOK定) * * * * * * * * * * * * * * * 景點: Santa Claus Village Rovaniemi市內 * * * * * * * * * * * * * * * 住宿: 原本book - Cumulus Resort Polar 去到佢話FULL晒, assign左我地去附近同集團既另一酒店, 房大啲同景靚啲(Cumulus Resort Pohjanhovi) * * * * * * * * * * * * * * * Morning EVERYONE!!! 今日係除夕日啦~!!! 梗要去啲特別地方過! 今朝早6點起身, 晨早起床, 清新開朗 , lalala 尋晚好好瞓, 幾乎一覺瞓天光, 個人叉足電! GENKI DESU! 因為我地預7:13到Rovaniemi, 所以嗱嗱淋刷牙洗臉,執返啲眼耳口鼻.... YEAH! READY TO LEAVE! 落車啦, 嘩!!!! 雪吖!! 遍地都係雪!!! 我地嗱嗱淋搬行李落火車 呢個站係大站, 所以火車7:35先開走, 有足夠時間俾人落車。 大家終於見到雪啦!! 超興奮!! 呢度就係我地住嗰卡車, 25號車卡 啲雪都好多喎~ 所以我地推行李都有啲困難! 因為全都係雪地, 有碌都冇用, 係要用「拖」喼方法~ 終於去到站嘅休息室, 成功!!! 頭先同我地同車嘅金毛! 見佢一落火車, 主人就帶佢跑月台啦! 佢好乖吖! 因為我地攞車時間係8:30, 宜家先8:00鐘, 所以喺附近影吓相。啲雪舖滿車上。 呢度有「真」聖誕樹吖!!! 白茫茫嘅月台, 加上個天黑黑, 感覺份外寧靜。 呢個就係Rovaniemi站前門啦! 團友們都坐喺度等~ VR的卡通代表人物~ 嗰個石像人 無聊揭吓FREE TOURIST MAGAZINE, 睇住啲極光先! 好準時, 8:30 有位SIXT職員黎, (初初以為係會PICKUP我地去佢地個BRANCH), 原來係派人黎呢度辦手續 因為佢得咭機, 所以原本諗住俾CASH變左碌卡, 佢會計埋按金數, 還車時會扣返, 唔會收$ 另外你可以選擇還車時入滿油, 佢都話我地聽出面入滿油嘅費用約€105度, 或者俾€85佢地, 唔使自己入滿油。 我地就選擇自己入滿油。 今次登記左兩位司機, 我地買埋車全保, 之前已揀 Mercedes-Benz Vito Tourer Aut. with GPS 9人車 - Sixt ( €1,331.17/7天, 圍番每人約HK$2,132/人) 辦完手續, 職員就帶司機們去停車處攞車啦! 佢簡單講左點操作, 冇乜特別野, 咁佢就功成身退啦! 兩位司機辛苦晒啦!!! 9:10度, READY TO GO LA!! 自駕遊即將開始! 駕車係9人車, 前面3個位, 中間對坐位, 我地4個人, 有6個位, 感覺寬敞啲! 行李就FIT啦, 放得晒! 9:30啦, BYE BYE 啦, 出發去我地喺Rovaniemi嘅第一站! 諗起都SO HIGH! 大家一上車, 好似好忙咁.....玩手機! 車程約5-7分鐘左右, 到達市中心附近了。 就係....麥當勞啦!!! 呢間麥記曾經係全世界最北的, 不過已經喺2013年俾俄羅斯取代了! 點解特登黎呢度??? 叫左餐先! 就係因為.......呢度會送POSTCARD呢! 好靚!歎杯熱朱古力先! 諗住叫啲新野,瘦身版漢堡包, 麻麻地好食... 早知叫返啲正常包! 食完野, 去影吓相先! 呢一邊有McDrive, 方便楂車人士 落緊飄雪~ 白雪雪嘅麥記, 好有意境! 冇乜幾可 其實好多旅客都會黎呢度食野打卡, 好似一個景點咁。 大家估唔估到咩廣告呢?? 真有心思! 好啦, 差唔多11點啦, 要趕去下一站啦! YEAH!!! 大概7分鐘車程, 我地到左呢度啦 Santa Claus Village, 泊好車後, 喺度一路行入村裏啦! 今日係31/12號, 佢既開放時間係10:00-17:00 入場完全免費 話明係santa claus village, 每處都充滿聖誕氣氛呢! 好夢幻吖! 好大嘅「真」聖誕樹呢!! Ho ho ho .......santa claus is coming town! 好開心吖, 整個氣氛都充滿童話FEEL! WOW, -1度, 身體就好暖, 係手凍啲啫! 我地PLAN好一到埗先去左鹿車先, 因為盡快喺天亮時玩! GO GO GO! 黎到時, 大約11:30度 我地揀坐1000m, 因為覺得400m太短又唔夠喉, 3km又太長, 所以揀中間啦! 成人盛惠€29/位, 約HK$270 買飛!! "俾錢仔!!" 攪掂! 入口處附近有個火堆俾人取暖或HEA 我哋排返1000m嗰條隊先! 啲麋鹿好忙吖, 一個接一個 佢地嘅樣好善良, 聽講冬天公的會脫角, 可能呢隻係一隻乸! 佢個正面好攪笑! 11:45啦, 我地既坐架READY好啦! 我地話佢聽6人, 佢地會特登用繩拖埋三架一齊。 YEAH! 出發, 原來佢都會行森林架喎, 真係好似童話世界咁吖, 好夢幻...... 但............梗有小插曲, 因為我排隊時, 已見部GOPRO仲有36%電, 我就諗, 換唔換電好呢??? 因為要拆MOUNT, 好似好煩, 希望捱到..... 點知...............一起步無耐, 突然話冇電......SHXXXT!!! 好在喺鹿車上, 較慢, 唯有喺鹿車上換電............ 真係同時間競賽咁..........好啦, 終於換左電, 重生啦!!! HAHA, 呢隻鹿可能係「公」的, 因為佢冇左一邊角呢!! 呢隻鹿鹿, 行得好近阿KIT, 直頭喺佢隔離咁滯! 佢對眼真係好有靈性。 行完一個round, 入埋森林嘅地方, 大約15分鐘, 其實當一個體驗, 已經好足夠了。 因為原本係諗住喺之後在Inari玩, 時間長啲, 但又貴啲, 宜家喺度玩, 慳返好多!!! GOOD DECISION! 辛苦你啦, 鹿仔! BYE BYE 啦! 跟住落黎,我地去到呢度, 係咩呢?? 就係條北極圈嘅線啦~!!!! 只要我地一經過條線, 就踏進北極圈啦~!!! 佢地下有條線嘅, 不過冬天, 全都係雪, 所以上面會吊住條電線, 夜晚發光。 咦......?!?!呢位團友, 大胆啦~!!!! 搭上白髮索女?!?! HAHA!! 嘩, 好大個雪人吖~!!!! 真係第一次見咁大嘅snowman~ 之後睇返團友啲朋友早一個月黎, 個雪人靚仔好多架~!!! 呢個有啲走左樣....原來! 好啦, 12:30去見聖誕老人先.....我哋去呢個SANTA CLAUS OFFICE度見佢 之前睇過人地啲BLOG, 原來呢度有兩個聖誕老人, 一個喺呢度, 一個喺另一個Santa Claus Holiday Village & Photography 我地見呢度影相啲背景好似靚啲, 所以就決定去呢個。 HAHA, 好可愛吓喎! 哎吔....原來聖誕老人要中場休息,攞籌下晝2點見! 冇得見住, 咁行吓附近,周圍影吓相啦咁! 今日可能係除夕, 所以都幾多人。 周圍都係聖誕樹, 襯埋啲聖誕屋, 的確幾靚! 我哋喺度都突然變左個大細路咁.......攞左個雪兜玩一餐! 雖然只係一個雪兜, 但都令大家玩得好開心!! 強國人果然利害!!! 呢度個指標, 話你聽世界各國嘅方向! 趁有時間, 去POST OFFICE望吓先, 黎呢度一重大任務就係寫postcard 好多靚靚郵票, 剩喺呢度先有架! 仲有..... 聖誕老人親手寫聖誕咭俾你.....€7.9 嘩, 呢個會唔會有啲恐怖呢??? 超多POST CARD吖, 花多眼亂吖~ 真係要花啲時間揀喎~但......弊, 14:00就到啦, 要返番去見左聖誕老人先, 所以留待見完再黎過啦 好啦, 我地準時14:00去返santa claus village office! 係要......排.......隊........ 陣間見完聖誕老人, 應該會黎望吓!睇吓有咩買~ 呢度要排隊, 準備見聖誕老人啦! 裏面唔俾影相, 本以為會好快啦, 點知.........裡面條隊係兜圈再兜圈。 攪到人無乜心機......仲要有啲員工不禮貌對待, 又有遊客插隊。 最後......排左差唔多1個半鐘頭, 至見到聖誕老人「真身」, SAY HI AND BYE, 影左張相,€30 完成任務!! 你話抵唔抵???? 我自己就覺得未必會再黎第二次, 咁遠都過黎, 都冇乜所謂囉~!! 最後差唔多15:30先攪掂。嗱嗱聲做第二件必要嘅事啦~ 呢度都有個郵箱, 分別係現在寄出, 同明年聖誕前寄出 時間無多, 揀POSTCARD揀得太耐了! 於是好努力咁霸位, 開始寫POST CARD啦, 周圍都係操國語嘅人, 有啲可能係台灣人。 呢張就係, 叫聖誕老人親自寫聖誕咭俾我嘅紙啦~ 你想佢寫咩文?? TICK你想揀嘅語言就得架啦, 寫返自己名同地址便可! 佢啲郵票好鬼靚吖~我都買左幾款 呢個櫃應該成日都有人介紹, 就係來自各國寄俾聖誕老人嘅信啦! 寫吖寫......統統寄出, 寫到手都軟....希望唔好寫錯.... 好可惜.....咁多封都有1封, 真係睇漏眼, 寫錯左地址!!!! 嗚~~!! 喺呢度寄出, 有樣特別嘅野就係.....呢個郵CHOP啦!!! 剩係呢度寄出先有!!!!特別有意思! 寫埋俾你睇, 係FOR 2018 CHRISTMAS架! 唔好投錯吖! 任務完成! 已經16:35啦, 冇乜時間啦, 因為呢度17:00關門。 好快速咁睇吓啲SOUVENIR SHOP,係幾靚, 但價錢唔平, 冇乜嘢啱~ 嘩,入黑了, -2度了~! 夜晚終於見到條線啦, 就係代表北極圈緯度66.5的嘅位置啦。 夜晚又唔同景況~ 其實宜家已經17:00了, 關門了, 亦係我地走嘅時候了。 原來我地今日冇時間到, 完全冇食個LUNCH呢~, 有啲肚餓添! 遠處見到好多光, 係snowman world, 裏面好似有ice bar之類, 不過好似要入場費 好啦, 我地慢慢行返去停車場啦, 見到呢架車, 幾靚呢! 我地喺聖誕老人村,前往我地今晚住嘅酒店,Cumulus Resort Polar 但去到佢突然話冇房了, 安排左附近同一集團另一間俾我地,Cumulus Resort Pohjanhovi 房大啲, 同個景靚啲, 因為望湖。 仲有個驚喜係, 一入房, 見到有排朱古力喺度, 酒店送嘅, 為讓我地轉酒店帶來不便嘅小小心意! 太肚餓了! 於是打開黎食啦~!! 好味! 間房好「是」正, 都舒服 仲有空間打開個喼, 窗外望出去, 係湖景~ 我哋架車泊左喺樓下, 最長嗰架! 今晚係除夕, 所以會有煙花睇, WOW 好期待芬蘭跨年會係點嘅呢? 呢度就係我地今晚下榻嘅酒店啦~!! HAHA, 度度都有雪兜嘅?? 隨時隨地都可以玩 陣間會去食飯啦! 見咁近, 帽都唔帶啦, 帶個耳套就得啦! 好啦, 出發去餐廳食我地嘅除夕大餐啦~!! 呢間餐廳好特別, 記住一定要訂位!!! 我地喺大半年前BOOK定了 就係呢間啦, Restaurant Nili, 喺酒店行過去都係大約5分鐘步程。 其實咁短路程, 真係都要帶帽,因為個頭好凍!! 好, LET'S COME IN! 睇吓MENU先! 佢有個SET DINNER 或可以散叫, WOW 有埋中文MENU, VERY GOOD! 我地就散嗌啦~ 呢度好有北歐風, 好有特色, 啲WAITER 同WAITRESS都好NICE! 幾乎全場爆滿咁滯! 芬蘭真係一個環保國家, 無時無刻都會有環保意識, 提醒大家, VERY GOOD! 一坐低, 每枱都有麵包薄餅等俾大家食。 當然小不了酒, 叫支白酒先, Waitress介紹呢隻酒, 好! 信佢! €48 飲!!!! 我地叫左4種前菜, 1) Tattikuksa - Nili牛肝菌(用芬蘭的木杯盛載) 加埋蘑菇茸小麥包 €9.9 呢個係signature之一 2) Lappilainen vitello tonnato €13,80 馴鹿舌 , 煙熏白鱒魚醬 3) Lokka €12,20 洛卡湖白魚配魚卵, 酸奶酪, 烤黑麥片 4) Rovaniemen Markkinat 23,80 X 2份起賣 羅瓦涅米特色菜, 又係Signature之一, 必試推介! 一路食, 一路飲 跟住又嗌左支紅酒 €44 紅酒配紅肉 主菜我地叫左馴鹿兩吃 烤同熏制鹿肉, 都幾特別! 熏制幾好味 €35.8 X 2 熊肉 €39.8 X 2 輕熏三文魚€22.8 signature 牛扒 €29.8 果真大魚大肉啦今餐! 非常滿足嘅一餐 真係非常盡慶嘅一晚!! 我地食到21:30度, 打道回府了!!! 冇乜野做, 去湖邊睇吓先~ 陣間應該喺呢度睇到煙花! 說時遲, 那時快, 突然有啲民間煙花發放呢! 沖個靚涼先, 長途跋涉下, 終於第一日住酒店, 可以沖返個靚涼啦~!! 宜家23:45度, 開始有人潮向呢個湖邊方向啦, 更加確定應該喺度放除夕煙花!! 我地都差不多時間落樓啦, 去霸個靚位先~!!! YEAH! 2018年!!!! 呢度冇人嗌COUNTDOWN倒數... 所以就係咁樣, 過左2017年啦~!! 嘩嘩嘩...都係得我哋嗌...HAHA 有啲人會帶埋啲滴滴金黎玩, 有啲手上就攞住酒樽或者杯飲酒慶祝~ 大家都好開心地迎接左2018年啦~!!! YEAH!! 有免費嘅特別活動!! YEAH 齊人啦~! 大家都細心欣賞煙花! 我地企高左喺一個位置!! 十零分鐘後, 煙花完結啦, 人潮慢慢散去....你睇, 都幾多人吓架! 睇完煙花, 好方便咁, 入返酒店啦 今天過得好充實吖!! 好啦, 上房休息啦, 因為....又要執行李, 點解又要??? 下回分曉.......... 好攰啦, 各位, GOODNIGHT 明天DAY3會去邊?? 我地再北上吖, 住玻璃屋呢!!!! * * * * * * * * * * * 想回顧DAY1 Helsinki上下集行程 CLICK DAY1-Helsinki篇(上集) CLICK DAY1-Helsinki篇(下集)