小妹未去過新加坡,但都聞說新加坡麥士威熟食中心(Maxwell Food Centre)嘅「天天海南雞飯」係必食名物,聽講佢嘅海南雞飯唔用一般油脂過多嘅黃雞,只用皮下脂肪較少嘅白羽肉雞,所以食落肉厚脂肪少,雞皮又爽又滑。依家香港開咗分店,小妹都想一試究竟,點知係失望而回。 小妹夜晚六點(夜晚開市時間)已經到門口,點知門口已經排咗啲人,所以都要等一陣。見咁多人排隊,都抱住期待嘅心情。等咗大概45分鐘,終於入到去,發現原來呢度唔係剩係「天天」一間舖,而係連同其餘三間新加坡米芝蓮食店「老街坊」、「超好面」同「五十年代」一齊開嘅舖頭,即是話一店四舖! 一場嚟到,梗係要試「海南雞飯」($148)!一上枱,碟雞都算大,望落油蠟蠟,都算靚仔。於是即刻夾一嚿試吓,點知一食就真係嚇一跳!雞肉過份軟腍鬆散,冇雞肉應有嘅彈性,味道亦係啖然無味,完全冇雞嘅油香同肉香,十足經過煲煮後嘅湯渣。雞皮脂肪的確少,但係極腍而冇爽滑感覺,食落同一般非專業做海南雞嘅酒樓或餐廳質素無誤!我有啲懷疑佢嘅受歡迎程度! 而油飯質素尚可,但雞已如此,飯亦難以救駕。 由於得小妹同朋友兩個嚟食,所以都係嗌多一個「山楂汁咕嚕肉」(正名「騰雲駕霧」,$98),玻璃器皿下放咗啲乾冰,上枱嘅時候煙霧瀰漫,都係嗰句,係好嘅打卡餸。味道當然都係一般我哋食嘅咕嚕肉嘅味道,只係個餸完全唔熱,微溫令我覺得佢係整定咗之後,再微微整番熱先上枱... ... 呢餐食咗兩樣嘢加兩杯嘢飲都已經Over $300,只可以講真係CP值完全唔高,呢個質素嘅海南雞飯但賣到咁貴,完全有負新加坡名物之名! 點擊圖片放大 店名:天天海南雞飯 地址:銅鑼灣Fashion Walk京士頓街9號H2舖 電話:31082181 營業時間:星期一至日12:00 - 15:30,18:00 - 00:30;公眾假期前夕12:00 - 15:30,18:00 - 00:30。