近呢十年香港人開始慢慢注重健康,因此大大小小嘅素食餐館如雨後春筍般相繼打入飲食界,為咗令寡口蔬菜變得有趣美味,眾餐廳各出其謀,製訂具話題性嘅菜單,吸引素食者同非素食者嘅青睞。而小妹到訪嘅呢間餐廳,正正就係頗具創意,將素菜打造成葷菜模樣,令人驚喜。 位於尖沙咀嘅Green Common,原本係一間專賣素食食品嘅綠色超市,為咗將素菜融入食物之中,推廣綠色生活,特意打造一間素食Café,將純素、無奶類製品、無五辛、無麩質等概念融人菜單中,菜式中運用咗不含基因改造嘅植物肉,即利用食物科技將植物營養取出,製成含豐富蛋白質同唔會破壞環境嘅植物肉。而煮法亦以少油、少鹽,多用橄欖油同岩鹽烹調,希望將健康概念放入菜單中。 七色藜麥超級碗($88) 雖然小妹唔係食肉獸一名,但偶然都會茹素清清腸胃,對於呢間餐廳,小妹私心講句,的確非常讚賞。尤其係七色藜麥超級碗($88),唔單止有Super Food藜麥,仲有羽衣甘藍、牛油果、紅腰豆、車厘茄、藍莓同粟米,七彩顏色令人胃口大開! 植物肉丸素芝士竹炭薄餅($108) 植物肉丸素芝士竹炭薄餅($108),肉丸食落有肉嘅纖維感,口感超似真肉;而芝士係純素 Daiya芝士,完全做到拉絲效果,同真芝士非常相似,而且更適合乳糖不耐症同素食者食用;至於竹炭製嘅餅底雖然口感有啲粗硬,但香脆可口。 未來漢堡Plus($108) 另外仲有同真Burger幾可亂真嘅素Burger未來漢堡Plus($108),由豌豆製成嘅漢堡排,「肉」質竟多汁香嫩,與真正嘅肉類無異,配上牛油果、素芝士、蕃茄同生菜,活脫脫就係一個正常漢堡排Burger! Café以木系同小清新式裝潢打造,吸引唔少年輕素食文青打卡,連小妹我都忍唔住要影吓相。 店內售賣不少素食產品 其實好多人對食素存在一定誤解,覺得好悶,怕唔夠營養,但其實素食都可以好好玩,素食可以由唔同嘅形態同方式呈現,再加上好多蔬菜、豆類都含有豐富嘅蛋白質與同維他命,絕對可以維持人所需嘅營養,所以不妨試吓一個星期嚟一餐或一日素食,你會發現你嘅生活會有所不同。 店名:Green Common 電話:31021220 地點:尖沙咀廣東道3-27號海港城海運大廈地下OT G61號舖 營業時間:星期一至日11:30 - 22:30 Blog:http://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331