夏日係桃李盛產嘅季節,四處桃香四溢,而最近就有酒店推出蜜桃主題下午茶,讓少女們一親桃桃香澤! 下午茶價錢唔貴,一Set只係$380,已經係兩個人嘅價錢,仲有兩杯蜜桃梳打調酒,認真抵食!如果上酒店網站下載優惠劵,仲可以免加一,每人都只係$190,以一般酒店嚟講,好難有呢個價! 呢個Tea Set有九款鹹、甜點,上層同中層都以甜點為主,上層係巴馬芝士鬆餅同香桃乳酪慕絲蛋糕,香桃乳酪慕絲頗驚喜,以牛奶朱古力做餅底,晶瑩琉璃果凍包住軟滑桃味慕絲,食落香甜,乳酪中和甜膩感,再配上黑白朱古力脆脆,口感豐富。 香桃乳酪慕絲蛋糕 相反鬆餅稍普通,略為唔夠鬆脆,亦冇乜芝士味,伴食冇果醬同Clotted Cream,只有忌廉,感覺稍單調。 巴馬芝士鬆餅 中層係迷你香桃酥皮卷、香桃白酒啫喱、蛋白梳乎厘配香桃汁同香桃牛奶布甸,香桃白酒啫喱係愛酒之人必試,白酒味香濃唔帶苦,配合清新桃香,食落好醒胃。 香桃白酒啫喱 香桃酥皮卷嘅做法極似蘋果肉桂酥皮卷,只係將蘋果換上桃肉,原以為呢個世上只有蘋果同肉桂最夾,點知桃肉都唔差。酥皮卷食落桃味雖然唔出,但香脆可口,係唔錯嘅小點。 迷你香桃酥皮卷 香桃牛奶布甸則不過不失,數塊桃肉同牛奶布甸嘅結合冇擦出火花,當個過場即可。至於蛋白梳乎厘配香桃汁嘅味道則較奇怪,但見旁人食時冇乜反應,或許純粹個人口味而已。 蛋白梳乎厘配香桃汁(前)香桃牛奶布甸(後) 下層為鹹點,分別係鴨肝醬撻、煙燻挪威三文魚卷麵包條、巴馬火腿配土耳其麵包,煙燻挪威三文魚卷麵包條可以話最抵食,一塊極厚長三文魚包住麵包條,厚厚一條,係大滿足之選。巴馬火腿配土耳其麵包鹹香味十足,只係麵包略硬。而鴨肝醬撻則不過不失,亦屬過場之輩。 鴨肝醬撻(前)煙燻挪威三文魚卷麵包條(後) 巴馬火腿配土耳其麵包 至於飲品係香桃梳打Cocktail,淡淡桃味配上梳打,冰涼清爽,如果你唔飲酒,都可以揀茶或咖啡。另外,餐後每人送一杯最新口味嘅Haagen-Dazs黃桃乳酪味雪糕,真係一個完美嘅Happy Ending! 成個Tea Set雖然好壞參半,但驚喜位都多,$380呢個價錢,買件衫都冇咗啦,而且仲要係兩個人,約埋閨密一齊去就最啱!不過,用餐地點唔係酒店食Buffet嗰間餐廳,而係大堂邊嘅一個小咖啡Corner,因為酒店嘅Buffet餐廳做緊另一個下午茶自助餐,如果介意用餐環境,就唔好揀喇! 【夏日逍遙.桃香滿載下午茶】 供應日期:2018年7月1日至8月31日 供應時間:下午3時至5時 價錢:港幣$380 (可供2人享用)【酒店eShop 9折優惠,免加一: http://goo.gl/EZmLRb】 電話:3160 6880 地址:紅磡都會海逸酒店大堂咖啡茶座