美式食物離唔開漢堡包、炸薯條、熱狗、三文治、牛排、奶昔等,一般美式餐廳除咗連鎖式快餐店之外,大多都打造成傳統美式格局,為嘅就係要畀人一種猶如置身喺美國嘅感覺。不過去得多都會無感,要吸引貪新一族,裝修嘅心思一定唔可以少! 點擊圖片放大 呢間位於中環嘅美式餐廳就以懷舊吸引人,將店內打造成19世紀火車用餐車廂,有齊用餐火車入面嘅卡座、車窗、鐵製托盤等,店內仲有著住舊式制服嘅Soda Jerk(冷飲櫃台售貨員),即係我哋俗稱嘅「水吧員」,唔講真係以為穿越咗去19世紀嘅火車用餐車廂!點擊圖片放大 經典嘅Circus Classic Burger(HK$78)以5安士牛肉餅配上生菜、蕃茄、醃小黃瓜同Circus秘製醬汁,保持住傳統嘅美式漢堡簡約味道。 Spicy Chicken Burger(HK$88)嘅雞肉就選用最嫩滑有彈性嘅雞髀肉,炸至鬆脆後,配上是拉差香甜辣椒醬(Sriracha)、墨西哥辣椒(Jalapeno)、蒙特利傑克起司(Jack Cheese),仲有以蛋黃醬、酸奶、大蒜等調製而成嘅田園沙律醬(Ranch Dressing),食落唔止有刺激嘅辣味,而且帶有微微嘅甜甜酸酸味道,香脆嘅雞肉配上香濃醬汁,味道同層次都極分明,值得一讚! 店內仲主打自家製奶昔同梳打汽水,小妹試咗熱情果菠蘿梳打,用嚟配Burger同薯條非常夾,但原來小店仲有自家製嘅可樂,有機會一定要嚟試吓。 店名:Burger Circus 電話:28787787 地址:中環蘇豪荷李活道22號地舖 營業時間:星期一至三11:00 - 23:00,星期四至六11:00 - 03:00,星期日11:00 - 23:00 Blog:http://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331