海鮮可以話係小妹最愛,對於蝦蟹,小妹絕對冇辦法抗拒!有Follow開小妹Blog嘅朋友,應該知道小妹曾經喺大閘蟹放題入面,3個鐘勁拆12隻大閘蟹;又喺韓國3個鐘內喪食7隻大紅蟹... ...認真癲狂!今次,小妹會介紹5間以海鮮為主打嘅餐廳,各位海鮮迷一定大愛! (1)龍蝦寶地 如果你係一個龍蝦迷,一定唔可以錯過呢間位於中環嘅龍蝦專門店,店內幾乎有一半以上嘅菜式都同龍蝦有關,而小妹覺得最值得推介嘅係「龍蝦蘿卜酥」,將龍蝦肉混合時蔬放入油鍋炸至香脆,製成龍蝦身,再配上龍蝦尾同龍蝦頭,活脫脫就係一隻龍蝦,非常賞心悅目! 不過講到最正,一定係「龍蝦撈麵」同「龍蝦伊麵」,雖然份量較少,但原隻龍蝦斬件上,每件啖啖肉,食到小妹欲罷不能。另外仲有「大龍蝦春卷」、菠蘿同生炒骨分開上嘅「菠蘿骨」、「濃湯浸時蔬」等都可一試!點擊圖片放大 +7 店名:龍麵館Dragon Noodles Academy 電話:25616688 地址:中環德輔道中68號萬宜大廈萬宜廊地下G04號舖 營業時間:星期一至日11:30 - 23:00 ____________________________ (2)松葉蟹盛 以日式釜飯為主打嘅「奈良上釜」,店中嘅「蟹盛」($298)係必嗌,以松葉蟹入饌,包括松葉蟹肉蟹膏蟹籽釜飯、松葉蟹腳天婦羅、松葉蟹冷物(凍松葉蟹腳、松葉蟹茶碗蒸)、松葉蟹味噌湯、漬物同時令水果,成個Set都同蟹有關,真係令蟹迷為之驚艷!點擊圖片放大 +6 如果你鍾意食天婦羅,「海鮮天婦羅盛合」($158)亦係必嗌,因為都會有松葉蟹腳!仲有穴子、海老(蝦)、蠔同魚,都幾多元化。點擊圖片放大 店名:奈良上釜 Kamameshi 電話:35554111 地址:銅鑼灣登龍街39號地舖 營業時間:星期一至日12:00 - 22:30 ____________________________ (3)爆膏蟹鍋 如果你「佬味」重,鐘意打邊爐,咁蜆蟹煲一定唔可以錯過,來自澳門嘅過江龍「好滾得」,以真材實料打動蟹迷嘅心,推出$268蜆蟹鍋「大石砸死蟹」,每隻上得枱嘅蟹都係經過嚴選嘅膏蟹,隻隻爆晒膏,啲肉又雪白又飽滿又彈牙,你以為呢個鍋一定過五嚿,點知都只係兩嚿,真係超值到爆!再加埋成鍋卜卜蜆,呢個價出面絕對食唔到!就算食到,啲料一定少,啲蟹一定冇膏,而且仲要係水蟹!所以呢間極力推介!食到咁上下,可以加湯再打邊爐,都係加錢再嗌料,小妹同朋友食完已經半飽,就嗌咗個蔬菜盤Balance一下。點擊圖片放大 +9 店名:好滾得 電話:64641626 地址:旺角彌敦道558-560號譽發廣場7樓 營業時間:星期一至日18:00 - 02:00 ____________________________ (4)龍蝦泡飯 有冇諗過泡飯咁平民嘅嘢,都可以加龍蝦?「村爺爺」就可以滿足你嘅願望!「殿.海鮮龍蝦湯泡飯」($98)有半隻龍蝦上,真材實料,加上湯底係以蝦頭同蝦殼熬出嚟,非常香濃入味!連唔食飯嘅小妹都忍唔住食多幾啖飯。點擊圖片放大 如果有朋友一齊嚟,都可以嗌埋個「花膠螺頭雞煲翅」($68),雖然花膠、螺頭同魚翅屬於較平民級質素,但煲出嚟啖湯一樣鮮甜,$68有齊咁多料,咩都抵番晒啦,要求都係唔好太高!點擊圖片放大 +2 店名:村爺爺龍蝦湯.泡飯.燉湯專家 電話:67738757 地址:油麻地砵蘭街72號地下 營業時間:星期一至日12:00 - 23:00 ____________________________ (5)磯燒海鮮 如果鍾意日式磯燒海鮮,呢間日式餐廳一定啱你。「焱丸蟹噌甲羅燒」($68)係每枱必嗌,有蟹肉、蟹膏、蟹籽同鵪鶉蛋,燒後蟹味濃郁,充滿鮮味。 點擊圖片放大 +2 而「松葉蟹膏帆立貝燒」($80)亦都值得一試,大大隻帆立貝配合蟹膏、蟹籽同日本時蔬,口感較清新。 仲有「大關五點盛」($250),有齊帆立貝、油甘魚、吞拿魚、三文魚同小妹至愛海膽,食材新鮮,食得小妹大嗌過癮。 如果唔夠飽,可以嗌一客「三文魚富士山」($68),其實係三文魚刺身包住三文魚小卷,食完就一定夠飽!點擊圖片放大 +2 店名:焱丸水產Flame Japanese Cuisine 電話:26548200/26519400/69621398 地址:尖沙咀棉登徑23號華楓大廈地下5&6號舖 營業時間:星期一至日12:30 - 15:00、18:00 - 00:00 ____________________________ Facebook :https://www.facebook.com/hongkonggirl331 Blog :http://blog.ulifestyle.com.hk/blogger/shinysharon/