文青們總係追求生活嘅質感,呢種質感好模糊,可以係一種概念,一種態度,又或者係一種感覺。如果你都追求呢種生活嘅質感,不妨去吓呢4間Cafe,感受或重拾一下呢份久違嘅感覺。 (1)在書海中徘徊@Kubrick 相信文青們都對油麻地百老匯電影中心一啲都唔陌生,因為想欣賞非主流、非商業嘅電影,呢度一定係個唔錯嘅選擇,加上定期舉行大大小小嘅座談會同分享會,自然吸引唔少文青聚集。而Kubrick Cafe正正就係處於呢個咁正嘅位置,畀文青打躉小歇,不過,佢除咗係一間Cafe之外,仲係一間書店,一整面嘅書牆同一片嘅書海,簡直令人書癮大發,忍唔住順手拈來一本,一睇就係一個下晝。點擊圖片放大 +2 Cafe除咗供應咖啡、茶、果汁之外,仲有輕食,好似沙律、意粉呀咁,當然價錢係文青價啦!小妹是次到訪,咁啱就係睇一套非主流電影,睇之前嚟醫吓肚。 「藜麥甜豆牛油果沙律配醋汁」($78),居然會有Super Food藜麥食,可見菜單都經過設計同花心思,味道方面,小妹就覺得落得太多醋汁,因為食到最後會勁酸。 而「香蒜蘑菇蟹肉扁意粉」($88)蒜香味濃,暗帶蘑菇香,蟹肉係雪過嘅冰鮮蟹肉,味道不過不失。點擊圖片放大 +4 雖然食物唔太突出,但最起碼有一片書海陪住你,可以打書釘之餘,仲可以打埋卡,真係呃唔少Like!食完嘢,仲可以整一張Post Card(做書籤都得)拎走,質感,原來同書有關! 店名:Kubrick 電話:23848929 地址:油麻地眾坊3號駿發花園H2地舖 營業時間:星期一至日11:30 - 22:00 _______________ (2)意式大宅進餐@HABITŪ table 以悠閒舒適見稱嘅意式精品咖啡店餐廳HABITŪ table,位處銅鑼灣誠品隔離,又係一間打造成文青聚腳地嘅地點。 室內主要以意大利式大宅作為主調,書架、木桌椅、燈泡、紅磚牆等令人感覺古典優雅,充滿簡約嘅歐陸風味。咖啡、茶係指定動作,但冷壓果汁都係一個唔錯嘅選擇,「Sunshine」嘅成份有菠蘿、甘旬同檸檬,味道酸酸甜甜,非常開胃。 嗌一份全日豪華早餐($138)就可以坐一日,自家煙燻三文魚同香茅菠菜肉腸係必試。 雜菌炒碎椰菜花($136)別具特色,以低脂高纖嘅椰菜搞碎取代意大利飯,配上雜菌燴製,健康又唔會太Heavy。 店名:HABITŪ table 電話:35431313 地址:銅鑼灣軒尼詩道500號希慎廣場8樓L804號舖 營業時間:星期一至四,日及公眾假期11:30 - 22:00,星期五至六11:30 - 22:30 _______________ (3)花蹤處處@朝花夕拾 文青似乎都離唔開花,只要Cafe有花,就一定有文青嘅蹤跡!「朝花夕拾」令小妹諗起魯迅嘅作品,不過最吸睛嘅唔係個名,而係一室嘅精製乾花,令小店充滿少女嘅浪漫氣息。點擊圖片放大 +3 呢度除咗可以睇花,仲可以食花,店內嘅食物好巧妙咁以「花」入饌,不過唔係用一般嘅花,而係用食用花,簡直係「花」蹤處處! 松葉蟹肉凱撒沙律($86)加入紫色、白色同粉色嘅食用花,令沙律嘅顏色更鮮艷吸引,配合蟹肉一齊食,多咗一份清新感覺。 桂花糖炸雞($72)入口甜脆帶桂花香,令人不停想食,不過得5件,有啲唔夠喉。 茗荷豚生姜燒($78),豚肉腌得入味,非常送飯。 甜品有櫻花水玄餅($45),好似水滴一樣晶瑩剔透,令人唔忍心將佢食落肚。 店名:朝花夕拾 電話:35720078 地址:尖沙咀河內道18號K11購物藝術館2樓201B號舖 營業時間:星期一至日,公眾假期,公眾假期前夕12:00 - 22:00 _______________ (4)日式簡約風情@Café&Meal MUJI 日本品牌MUJI行開簡約風格,「Less is more」完全可以形容佢,由文具、日用品到零食,全部都充滿生活質感。買過MUJI即食食物嘅朋友,都不期然讚嘆佢嘅好味程度超出預期,如果有即叫即整嘅食物,相信都吸唔少Fans!點擊圖片放大 +2 而MUJI又真係開咗間Cafe,賣嘅係日式Fusion料理,日式炸雞、燴牛柳、香橙沙律、蜜桃蝦仁... ...每樣都令人食指大動!料理菜式會定期轉換,時刻保持新鮮感! 店名:Café&Meal MUJI 電話:39713120 地址:銅鑼灣波斯富街99號利舞臺廣場3樓 營業時間:星期一至日11:00 - 22:30 _______________ Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331