元朗不愧係一個美食集中地,只要你講得出嘅美食,喺呢度都可以搵到,小妹住喺元朗,自然近水樓台,所以好多時都可以第一時間食到好嘢!而小妹最鍾意一啲肯用心嘅小店,因為幸福嘅味道永遠令人感到窩心。 (1)媽媽嘅味道@初心手作料理 呢間位於元朗金輝徑、以家庭式料理店為概念嘅小店,雖然店面簡單唔起眼,一般人行過好易錯過,但係如果你有挖寶嘅好奇心,就會發覺佢內有乾坤。小店嘅設計係以日本家庭為藍本,打造成舒適窩心嘅用餐環境,令人猶如置身家中。餐點亦係以日式為主,牛肉薑燒定食($78)、芝麻濃湯牛肉手打烏冬($78)係店內主打,隨餐會附上湯、小食同前菜,味道雖然簡單,但就有一種似媽媽煮嘅餸嘅感覺,食落好舒服窩心,令人產生一種難以言喻嘅幸福感。 牛肉薑燒定食($78) 芝麻濃湯牛肉手打烏冬($78) 店名:初心手作料理 電話:24786478 地址:元朗金輝徑28號好盛洋樓5號地下 營業時間:星期一至日11:30 - 16:00,18:00 - 22:30 _________________ (2)潔靜心靈@大力素食 每當小妹覺得心煩嘅時候,總會諗起素食。呢間位於朗屏西鐵站附近嘅素食店,交通非常方便,主要係做街坊生意。小店係以家庭式經營,主打健康有營嘅中式素食。小妹最愛佢嘅咕嚕肉($69),正常嘅咕嚕肉多油又高脂,但係以大豆整成嘅肉就冇咁肥膩,食落嘅味道唔單止同一般咕嚕肉冇分別,酸酸甜甜超易送飯。 羅漢上素($65)煮得入味之餘,又可以食到蔬菜嘅原味道,亦係我嘅必嗌之選。 另外仲有蟹肉時蔬($75)、紅燒豆腐($68)、魚香咖子($65)、齋鹵味($26/細),全部都用心烹調,味道亦超似住家餸,值得一試。印象最深刻係店內有一尊觀音像,對住觀音娘娘食飯,令人心靈多咗一份平靜。 蟹肉時蔬($75) 紅燒豆腐($68) 魚香咖子($65) 齋鹵味($26/細) 店名:大力素食 電話:24758928 地址:元朗媽橫路35號福昌樓地下7號舖 營業時間:星期一休息,星期二至日11:00 - 22:00 _________________ Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331