元朗Yoho呢個商場可以話係小妹嘅開飯熱點,點解咁講?除咗佢不斷擴展嘅版圖之外,商場入面仲有好多Shopping熱店,行街行到攰,就近又有美食,點可以唔心動? (1)東瀛橫丁居酒屋@一杯鐵板燒居酒屋 位於商場入面嘅「一杯鐵板燒居酒屋」,同一般打造成家庭式經營嘅居酒屋非常唔同,而係以日本橫丁作為設計藍本,將店內打造成日本橫丁嘅居酒屋,充滿東瀛Style。食物方面,當然都係以日式食物為主,由於係居酒屋,食物份量唔算大,價錢亦自然向下調少少,方便畀大家小酌一番。 鰻魚茶漬飯($65) 豚平關西燒($55) 東洋卷($65) 蟹肉牛油果卷($86) 小妹試咗鰻魚茶漬飯($65)、豚平關西燒($55)、東洋卷($65)同蟹肉牛油果卷($86),味道都算唔錯,再配埋巨峰燒酌梳打($45)同荔枝燒酌梳打($45),甜甜哋,易入口,用嚟配襯份量適中嘅日式小食就最啱。點擊圖片放大 +2 店名:一杯鐵板燒居酒屋 電話:24339828 地址:元朗元龍街9號形點一期地下G006號舖 營業時間:星期一至日11:30 - 23:30 ________________ (2)美國風吹襲@Stormies 餐廳以航海設計為主題,一片落地大玻璃令人有種寫意舒適嘅感覺,充滿美式餐廳風情。食物方面都係以大大份食物為主,好似小妹試嘅小食拼盤($228),入面有芝士炸薯、炸雞翼、炸魷魚圈、墨西哥牛肉簿餅、意式三文魚多士同薯條,認真豐富,好啱一大班朋友嚟Share,不過小妹今次同朋友嚟,只能夠拼盤以外再嗌多一樣嘢食,因為真係太大份! 小妹朋友想試肉眼牛排(10安士)配香草牛油、黑松露薯條及雜菜沙律($218),於是就叫咗一份。送上嚟嘅時候,塊牛排對兩個女仔嚟講都實在太大,所以都差啲食唔晒。 呢度好多人嗌雞尾酒,我都唔輸蝕,同朋友嚟一杯Long Island同Stormies,感覺就似喺美國食店入面食個飯! 店名:Stormies 電話:22741988 地址:元朗元龍街9號形點一期地下G005號舖 營業時間:星期一至日12:00 - 00:00 ________________ (3)新駐澳門菜@亞蘇爾 喺小妹嘅印象入面,澳門菜同葡國菜掛鈎,馬介休、燒乳豬、葡國鴨、紅豆豬手、燴牛尾牛腸... ...而呢間開咗幾個月嘅澳門菜餐廳,當然大部份葡菜都有,但都有澳門經常見到嘅蟹粥、豬排包、葡撻等,等大家心血來潮想去澳門食美食但又唔可以即刻去嘅時候,可以止吓癮先。 招牌活蜆海膽鮮蟹粥($168/兩位用) 招牌活蜆海膽鮮蟹粥($168/兩位用)唔單止有蟹,仲有蜆同海膽,多咗一份鮮味,不過小妹覺得份量比較少,而蟹又係用蟹仔,所以略嫌唔夠吸引。 烤焗原條盲鰽魚伴香蒜牛油煮活蜆($148)以烤焗方式烹調新鮮嘅盲鰽魚,肉質保持到新嫩多汁,蜆嘅Size夠大,肉亦飽滿。 香烤乳豬件伴慢烤番茄及意瓜沙律($168),乳豬嘅皮非常脆,而肉質都夠軟腍,但味道就冇乜,反而隔離嘅烤番茄同瓜就烤得好好食。點擊圖片放大 +2 店名:亞蘇爾 電話:35869133 地址:元朗元龍街9號形點1期2樓2056號舖 營業時間:星期一至日11:30 - 23:00 ________________ (4)懷舊茶餐廳@老夫子餐館 茶記雖然唔係小妹嘅最愛,但偶然食吓都幾有新鮮感,開咗個幾月嘅老夫子餐廳,以老夫子做主題,門口嘅老夫子同大蕃薯一比一公仔係打卡熱點,店內亦有唔少老夫子人物嘅漫畫圖,仲有老夫子精品賣,簡直係為Fans而設!點擊圖片放大 +2 餐點其實同老夫子冇乜關係,只係一般茶餐廳常見嘅常餐特餐碟頭飯,小妹試咗茄牛烏冬($48)同瑞士汁乾炒豬排炒烏冬($72),味道偏向濃重,微鹹,可能小妹嘅口味偏淡,所以感覺一般,不過如果係For打卡,都OK嘅。 店名:老夫子餐館 電話:28080819 地址:元朗朗日路8號形點二期1樓A101號舖 營業時間:星期一至日07:00 - 23:00 ________________ *特別加映* 德國糧油雜貨店 Vom Fass 如果行過商場嘅一田超市,一定見過呢個叫「 Vom Fass」嘅攤位,「 Vom Fass」係德文,有「 From the Cask」(來自木桶)嘅意思,係指呢度嘅酒同醋都沿用傳統德國人嘅做法,由橡木桶釀製,用橡木桶釀製酒、醋會產生天然嘅酵素同油脂,有助發酵,令味道同品質更好。呢間來自德國嘅小店,原來喺世界已經有300幾間分店,以售賣糧油雜貨為主。 而呢度有個特別嘅售賣方法,就係客人會先買一個樽,然後再買油、醋或酒,下一次嚟嘅時候帶埋個樽嚟買,又方便又環保,簡直似係返到六七十年代打油打酒嘅時候。小妹即刻買番枝熱情果辣椒酒,係一款已溝好嘅雞尾酒,味道又甜又辣,非常刺激,最重要係產品個概念好呀嘛! 店名: Vom Fass 電話:N/A 地址:元朗朗日路8號形點一期 營業時間:N/A ________________ Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331