小妹唔係炸雞狂,但偶然都會對香口嘢心癮起,就好似炸雞,間唔時做吓宵夜,同朋友飲杯酒,食吓雞,就係最Relax嘅時間!而呢3間舖頭,小妹覺得最啱成班Girls滋味分享! (1)燒酒配蜜糖咖喱雞@Goobne Chicken 來自韓國嘅過江龍Goobne Chicken被稱為「韓國第一烤雞品牌」,貴為炸雞中嘅名牌,自然都要搵一個有番咁上下嘅名人做代言,不過佢唔係搵一個,而係搵一隊!以韓國當紅組合EXO做代言人簡直係明智嘅選擇,難怪門口成日都排晒長龍,除咗係想攞到印有組合樣嘅餐紙之外,佢唔同口味嘅韓式焗爐烤雞更加係一個重要嘅吸引處。摒棄傳統炸雞嘅油膩感,以烤焗形式製作,將雞嘅油份逼出,做到低熱量、低膽固醇、低鈉同無反式脂肪,令宵夜變得更健康。 「招牌蜜糖咖喱烤雞」($168)嘅外皮佈滿蜜糖嘅潤甜同咖喱嘅辛香,咬落去外層香脆,內裡肉質嫩滑多汁,再配上店內招牌水果燒酒「柚子蜜燒酒」($150),簡直係絕配!如果唔夠飽,叫一客「芝士炒年糕」($148),感覺就好似處身喺首爾嘅韓式食店入面,正呀!點擊圖片放大 +3 店名:Goobne Chicken 電話:23110001 地址:尖沙咀赫德道4號The Hart 2樓 營業時間:星期一至日12:00 - 02:00 ________________ (2)華麗棉花糖炸雞@Yadllie Plate 同樣係嚟自韓國嘅Yadllie Plate,主打就真係炸雞,不過係炸韓國本地走地雞,以「S.W.A.G」為料理宗旨,S係指Soy Sauce,以韓國濟州島栽培嘅各種新鮮蔬菜同 20 幾種天然材料混合而成嘅秘製醬料,腌製韓雞72個鐘以上,令炸雞味道更香濃!W係Without Dress,每份雞都以人手將腌製好嘅雞肉一件件撲上秘製乾粉,唔會用大量調味粉整炸漿。而A係指A Pressure Fryer,即係用壓力油炸鍋,以雙重高壓油炸技術處理,唔單止可以鎖住雞嘅肉汁,仲可以排走多餘油份,達至外脆內嫩。而G則係Great Taste,唔使講就係綜合以上三樣原則,證明佢嘅雞好味啦!點擊圖片放大 +2 小妹最鍾意佢嘅棉花糖作料炸雞($168),甜脆炸雞上鋪上大大舊棉花糖,上枱之後店員會用火槍熱溶啲棉花糖,令糖完全融入炸雞之中,更加香甜,同最傳統嘅炸雞相比,呢個惹味好多。 而小妹覺得「面捲蝦」($98)幾得意,用麵包住中蝦炸至香口,口感得意,係唔錯嘅小食,再配芒果菠蘿特飲($98),爽呀!點擊圖片放大 +3 店名:Yadllie Plate 電話:23600233 地址:旺角西洋菜街1號兆萬中心11樓 營業時間:星期一至日17:00 - 00:00 ________________ (3)紐約水牛城炸雞@The Cheese Cake Factory 嚟自美國嘅人氣連鎖餐廳,睇個店名就知道同芝士蛋糕有關,而主打亦係芝士蛋糕,只係估唔到佢嘅「水牛城雞翼」($108)都咁出色,食落脆口又帶點醬汁嘅香辣,配上蔬菜條同芝士醬一齊食,果然係美式必食美食之一,再飲番杯「士多啤梨馬天尼」($90),同場加映「墨西哥北部辣雞肉夾餅」($148),餐後食一件招牌「鮮士多啤梨芝士蛋糕」($79),簡直係大滿足! 「水牛城雞翼」($108) 「墨西哥北部辣雞肉夾餅」($148) 「士多啤梨馬天尼」($90) 「鮮士多啤梨芝士蛋糕」($79) 點擊圖片放大 +2 不過建議大家喺唔係好肚餓嘅時候去攞定籌、排定隊,因為至少要等兩個鐘先有得食架! 店名:芝樂坊餐廳The Cheesecake Factory 電話:27916628 地址:尖沙咀廣東道25號海港城港威商場地下G102號舖 營業時間:今日營業11:00 - 23:00,星期一至六11:00 - 23:00,星期日10:00 - 23:00 ________________ Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331