作為一個文青,坐Café是常識吧?嗌一杯Latte,食件Cake,帶埋部蛇果電腦,搵個位Hea足一個下晝,幾咁寫意,呢啲先叫做有質感嘅生活。追求質感生活,係文青嘅終生目標,而質感通常都離唔開藝術、書、森林、原木… …小妹將會推介7間文青必去嘅小清新Café,等你感受一下做文青嘅質感。 (1)果甜滋味@一起果醬 總店設喺西貢嘅「一起果醬」,喺尖沙咀都開咗分店,主打果醬料理,從主食、飲品到甜品,都離唔開果醬。店內嘅果醬全部都係人手製作,除咗平時常見嘅士多啤梨、藍莓等果醬外,更有店主自己創作嘅特色果醬,好似雪耳木瓜、玉桂蘋果、桂花雪梨… …全部都充滿香港特式。 店門前一架單車裝飾、門面嘅一抹Tiffany藍色、一室充滿小歐洲風情嘅裝潢、以原木打造而成嘅桌椅,令人倍感寫意。 嚟一客果醬烤豬肋骨,以士多啤梨果醬醃製豬肋骨,再以烤焗方式烹調,未上枱已食指大動。飲品同樣以新鮮果醬打造,將梳打水同果醬混合,變成自家鮮製果醬梳打,「自家」品牌係文青最愛嘅消暑飲品。 意粉難以以果醬入饌,一客軟殼蟹意粉惹味鮮香,係唔錯嘅選擇。 店名:一起果醬(Let’s Jam) 電話:39565646 地址:尖沙咀松山道15-17號地下D舖 營業時間:星期一至五12:00 - 23:30,星期六至日10:00 - 23:30,公眾假期10:00 - 23:30 _______________________ (2)質感飲品@飼說 唔好以為Café冇酒飲,現今唔少Café都將之打理成小酒館,畀嗜酒嘅文青小酌一番,而且賣嘅唔剩只係酒,賣嘅係一種感覺。「飼說」位於銅鑼灣商用大廈嘅樓上舖,同一般Café一樣提供輕食、西餐、咖啡同花茶,唔同嘅係,呢度會提供特色Cocktail同Mocktail,打造微醺感覺。點擊圖片放大 主打Cocktail「GEIKO」($88)以日本清酒、荔枝糖漿、綠茶同荔枝肉打造而成,再加上以荔枝清酒製成嘅啫喱,令Cocktail入口香甜,濃郁嘅荔枝味唔會蓋過清酒嘅清辛,微甘綠茶亦帶出酒香,值得一試。 「鮮西柚香桃梳打」($68)雖係無酒精嘅Mocktail,平凡不過嘅飲品卻以香水樽盛載,賣相已值回票價,香水樽身凹凸有致,充滿質感,係唔少文青必嗌嘅飲品。 食物方面,以西式餐點為主,好似「黑啤烤豬肋骨配意式蔬菜」($178/全份)、「焗士多啤梨雞翼」($98/10件)、「小食拼盤(包括炸薯條、炸魷魚圈、炸蝦、炸紫薯餅、炸芝士薯波、炸雞翼)」($128)、「芝士牛肉漢堡排雜菌醬汁飯」($88),都非常適合一大班朋友開心Share! 「芝士牛肉漢堡排雜菌醬汁飯」($88) 「焗士多啤梨雞翼」($98/10件) 「小食拼盤(包括炸薯條、炸魷魚圈、炸蝦、炸紫薯餅、炸芝士薯波、炸雞翼)」($128) 「黑啤烤豬肋骨配意式蔬菜」($178/全份) 店名:飼說 電話:92274664 地址:銅鑼灣怡和街42-44號華人銀行東區大廈2樓 營業時間:星期一至日12:00 - 23:00 _______________________ (3)食得藝術@ATUM Restaurant 見到Autum出品,一定同藝術離唔開關係,試過佢嘅甜品畫,相信一定印象深刻,而呢間主打西式餐點嘅分店,同樣離唔開藝術。首先,菜式名就已經藝術到爆,好似「蟹.粟米.爆谷.意大利粉」($158)同「虎蝦.紅皮椒汁.焗薯.沙律」($178),表面上睇似係將啲材料Show晒出嚟,但實際有睇過藝術展嘅都會知道呢個係藝術作品名嘅表現方式。點擊圖片放大 +2 「蟹.粟米.爆谷.意大利粉」($158) 「虎蝦.紅皮椒汁.焗薯.沙律」($178) 其次係一室嘅裝潢都經過精心設計,打造成畫廊形象,令每位到訪嘅客人欣賞食物如欣賞藝術品一樣。再嚟一杯「士多啤梨西柚Mocktail」($48),酸酸甜甜超開胃。 店名:ATUM Restaurant 電話:35861959 地址:尖沙咀河內道18號K11購物藝術館1樓101B號舖 營業時間:星期一至日12:00 - 23:00 _______________________ (4)玻璃夢幻屋@Glasshouse 本店喺中環,店如其名,以夢幻嘅玻璃屋為設計概念,亦係以西式餐點為主,亦有少部份Fusion菜。元朗分店亦盡量設計成玻璃屋嘅觀感,但反而一室森林系裝潢更突出,相信係文青們杯茶。烤雞炒意粉係小妹最愛,仲有雞翼、青口、Pizza等西式餐點,配合埋Cafe式特飲「玫瑰荔枝特飲」、「香桃芒果特飲」等,非常寫意。點擊圖片放大 +3 玫瑰荔枝特飲 香桃芒果特飲 店名:Glasshouse 電話:23516600 地址:元朗元龍街9號形點一期1樓1028-1029號舖 營業時間:星期一至日12:00 - 23:00 _______________________ (5)元朗小店@Darci by Aldou 有追開小妹Blog嘅朋友都知道,小妹曾經介紹過一間位於元朗、名為「Aldou」嘅人氣Cafe,小店喺區內甚受文青歡迎,而事隔幾個月後,佢竟然開咗一間名為「Darci by Aldou」嘅分店,同樣打造成小清新風格,同樣Serve西餐,燒大蝦、白酒青口、燒大蝦南瓜意大利飯」,各有特色。點擊圖片放大 +4 店名:Darci by Aldou 電話:27883339 地址:元朗鳳攸南街9號好順利大廈地下60號 營業時間:星期一12:00 - 16:30,18:00 - 22:00。星期二全日休息。星期三至日12:00 - 16:30,18:00 - 22:00 _______________________ (6)溫室用餐@I's Land Cafe 店舖雖然位於偏遠工業區觀塘,卻係區內數一數二嘅文青Cafe,尤其係室內嘅「花草樹木」,令人猶如置身溫室之中。由於去嘅時候正值特別節日,所以餐都係跟Set嗌,價錢亦較貴。點擊圖片放大 +3 首先頭盤係小食拼盤,「仲夏拼盤」有巴馬火腿捲蜜瓜、煙三文魚配蘆筍同法式帶子,仲有南瓜湯同火龍果雜菜沙律伴夏威夷芒果醬;點擊圖片放大 主菜有三樣,由於要同好朋友Share,所以嗌多幾樣試吓。「秋葵北海道帶灸墨汁魷魚意大利麵」($278)、「窄身厚切美國頂級肉眼伴燒鵝肝」($348)、「原隻赤蝦伴扇貝三文魚蟹肉燴意大利飯」($288); 「秋葵北海道帶灸墨汁魷魚意大利麵」($278) 「窄身厚切美國頂級肉眼伴燒鵝肝」($348) 「原隻赤蝦伴扇貝三文魚蟹肉燴意大利飯」($288) 甜品則有「紅桑子心太軟雪糕」。 店名:I's Land Cafe 電話:53073636 地址:觀塘開源道62號駱駝漆大廈1座6樓A舖 營業時間:星期一至日12:00 - 22:30 _______________________ (7)甜蜜可可@LEX Coffee 樓底高嘅餐廳從來都有優勢,因為唔會令人產生壓迫感,如果採用埋自然光,對住一大片落地大玻璃,感受透進嚟微暖嘅陽光,欣賞街外景致同熙來攘往嘅人群,身心頓時放鬆,LEX Coffee正正就係可以滿足你以上需求嘅Dream Cafe。 點擊圖片放大 呢度最出名係「LEX Drink by Venchi」($58),牛奶、朱古力分開上,你可以依照個人需求調校名牌Venchi朱古力同牛奶嘅比例,飲一杯自家製朱古力,簡直甜到入心。 食物方面,「Duck Breast with Venchi Gravy」($138),鴨胸以Venchi朱古力同橙汁入饌,朱古力醬巧妙帶出鴨嘅鮮味,橙汁又中和鴨嘅油膩感,創意度十足,食落毫無違和感。 「Prawn Capellini with Lobster Saurce」($138),龍蝦汁意粉香濃惹味。 甜品「Bleeding Pear & Rose Crystal」(68)好有驚喜,紅酒啤梨配合粉紅白酒啫喱,微酸中帶甜,甜中又帶一點酸,同一般甜到漏嘅飯後甜品好唔同,值得一試。 店名:LEX Coffee 電話:21499633 地址:西環堅尼地城卑路乍街100號地舖 營業時間:星期一至四11:00 - 21:00,星期五至日11:00 - 22:00 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331