好耐冇同好閨蜜食Afternoon Tea,收到銅鑼灣Mira Moon嘅西班牙餐廳Supergiant Tapas & Cocktail Bar推出「粉紅氣泡」下午茶、食完Tea仲有我最愛嘅Moët & Chandon Rosë香檳送嘅消息,小妹第一時間打電話去Book枱! 首先上枱嘅係Moët & Chandon粉紅香檳Cocktail,大家都知道Moët & Chandon Rosë味道偏酸,但Cocktail加入荔枝糖漿後,味道即刻變得甜蜜易入口,配埋玫瑰花瓣嘅清幽花香同杯邊嘅粉紅沙糖,浪漫醉人,小妹忍唔住飲完一啖又一啖,未上個Tea Set,酒已經冇咗一半。 終於上Tea Set喇!以木架呈現嘅鹹、甜點多咗一份優雅感覺,小妹習慣先食甜點,因為個人認為結尾食太多甜嘢會感覺好Full,所以通常都唔會按章「作業」。經過侍應一番介紹之後,首先食嘅係主打嘅「粉紅火烈鳥忌廉泡芙」,粉紅色嘅泡芙酥皮整成火烈鳥模樣,非常可愛。一口咬下,外面微脆,內裡Creamy,係一個好嘅開始。 「朱古力脆脆蛋糕」集合5層唔同質感嘅朱古力,底層係可可脆米,面層又有朱古力脆脆,食落多重口感,係我嘅最愛! 「熱情果朱古力」味道比較濃郁,黑朱古力同熱情果醬味道相配,熱情果醬嘅甜可以中和黑朱古力嘅苦,甜苦相間。 左:鹽漬櫻花法式小蛋糕中:香檳Macaron右:熱情果朱古力 不過「紅粉緋緋朱古力迷你冬甩」就比較甜膩,口感偏軟而欠彈性,而「香檳Macaron」、「鹽漬櫻花法式小蛋糕」、自家製「英式提子鬆餅」則比較平凡,驚喜唔大。 紅粉緋緋朱古力迷你冬甩 相反,三款鹹點比較取勝,「白毛豬火腿水晶包」採用鹹香度十足嘅白毛豬火腿,配合烤焗脆口嘅水晶包同清新嘅蕃茄蓉,令白毛豬嘅香味更突出;「卡門貝爾芝士伴無花果醬」係小妹嘅最愛,無花果醬甜甜蜜蜜唔會太膩,卡門貝爾芝士經過輕烤,奶味濃郁,質感香軟,食完之後,芝士餘韻充滿整個口腔;「魚子醬青口吐司」採用口感軟滑嘅BB藍青口同粒粒分明嘅黑魚子,口感豐富,層次分明。經驗話我知,將鹹點放到最後係冇錯嘅! 白毛豬火腿水晶包 卡門貝爾芝士伴無花果醬 魚子醬青口吐司 食完Tea仲會每人送一枝Mini版Moët & Chandon Rosë(冇記錯,出面買一枝要$180),真係驚喜無限,$348+10%一個Tea Set,仲要每人送一枝差唔多$180嘅香檳,條數你識得計啦!所以快啲約埋好閨蜜去試啦! 店名:Supergiant Tapas & Cocktail Bar 電話:2643 8875 地址:銅鑼灣謝斐道388號問月酒店3樓 營業時間:7am – 1am 供應日期:2018年1月19日至4月1日 逢星期五至日 3pm-6pm 收費:$348/兩位用(包兩杯香檳雞尾酒) 備註:推廣期內客人凡惠顧兩位享用套餐,可每人獲贈Moët & Chandon迷你粉紅香檳2支 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331