是日小妹獲「沙田萬怡酒店」會所一號「萬濤」嘅邀請試婚宴菜式,原以為主打中式婚宴嘅場地好老土,點知一入到嚟就覺得好小清新,感覺西式元素多啲。個場唔算大,因為係專門為年輕人打造嘅小型婚禮場地,大概擺到24圍,唔會太舖張,又唔會太失禮。點擊圖片放大 菜式連甜品總共有12道菜,有齊鮑魚、花膠、石斑、乳豬等婚宴必備菜式,講到呢度,你會問:「咁翅呢?」其實依家好多婚宴為咗響應環保,都唔會將魚翅納入菜單中,而好多年輕人亦因為想環保啲,而唔再食翅,呢個亦係大趨勢。不過如果老人家堅持要食翅先架勢,廚師都係會將其中一味餸改做「高湯海味翅」,令家中老人家感覺舒服啲。 第一道「鴻運脆皮乳豬」,乳豬燒得啱啱好,外皮香脆,皮下黏著一層豐腴嘅脂肪,食落雖然邪惡感十足,但係勝在膩感唔高,係一個好嘅Opening。 「野菌泡蝦球」比較清淡,可以中和第一道乳豬嘅微膩感,蝦球晶瑩剔透,爽口彈牙,野菌清香,相信賓客會鍾意。 「百花海皇卷」外型極似炸鮮奶,食落外脆內軟,點啲沙律醬食,酸甜有致。 「珊瑚扒翡翠」滿滿嘅蛋白蟹肉淋喺鮮嫩嘅菠菜上面,鮮甜清新。 「雲腿雞絲燴花膠」係一道較香濃嘅湯羹,質地傑身,膠質重,每一羹都食到花膠同雞絲,用料十足! 「清蒸海石斑」,雖然我影出嚟好細條,但實物真係超級大條,魚肉微微黏骨,肉質鮮甜,唔會蒸得過老,咁大條魚都處理得咁好,好考師傅功夫。 「翡翠蠔皇鮑片」同「脆皮吊燒雞」同樣係味道香濃嘅菜式,前者以蠔汁扣嘅鮑片唔會太韌,微微黏牙;後者表皮炸得香脆十足,雞肉依然保持嫩滑,令小妹食完一舊又一舊。食到呢度,突然發現廚師安排菜式上好有心思,因為每一道餸都係濃味同清淡相間,唔會一味漏到食唔落,又唔會一味淡而無味。 終於嚟到粥粉麵飯嘅環節,通常大家食到呢度都會放棄,不過小妹就覺得個「砂鍋雞絲飯」炒得香口,「龍芽花菇炆伊麵」炆得頗入味。 最後係甜品喇,雖然甜品行西式路線,唔再係傳統嘅紅豆沙,而係「意式泡芙酥」同「蓮子百合紅豆糕」,味道雖各有特色,但小妹覺得兩者有啲唔夾,「意式泡芙酥」屬飽肚類甜品,而且內涵係Cream,再加上質感同樣厚重嘅「蓮子百合紅豆糕」,食完就會有一種好Full嘅感覺。所以如果係「意式泡芙酥配雪糕」(一凍一熱,冰火交集)或者係「蓮子百合紅豆糕配椰汁西米露」(椰香與紅豆嘅甜好夾),相信會係一個更甜蜜嘅Ending! 店名:會所一號 萬濤(ClubONE River View) 電話:26562033 地址:沙田安平街1號香港沙田萬怡酒店商場1樓 營業時間:星期一至五11:00-15:00,18:00-22:00。星期六至日10:00-15:00,18:00-22:00。