去過台灣嘅人都一定食過火鍋,涮涮鍋、麻辣鍋、酸菜白肉鍋、沙茶火鍋等相信係唔少人嘅最愛,而呢啲火鍋,大多都係放題形式,入到去任食,種類雖多,但大部份食材質素麻麻,而且價錢唔平。大家有冇諗過食火鍋其實都可以好平好高質?小妹食過兩間台北嘅高質火鍋店,覺得好值得推介畀大家! (1)精緻在地蔬菜小農鍋@小農鍋物Farmer's Table 行文青風格嘅「小農鍋物」,主打台灣各農產地直送嘅農作物,例如蕃薯、南瓜、彩色蘿蔔、蕃茄等蔬果,由於係出自本地農民之手,加上台灣山明水秀,地靈人傑,種出嚟嘅農作物份外清甜爽口,用嚟打邊爐簡直一流!價錢方面會根據你揀嘅肉類套餐而定,大概喺台幣$390至$688之間,即係港紙$100至$180,套餐包括自選小農肉品(在地豬、牛、羊、海鮮)、當季小農菜盤(在地農場蔬菜瓜果)、主食(麵或飯)、甜品同飲品,湯底四選一,有柴魚昆布、昆布、豚骨蔬菜湯(另加NT$30)同養生天麻雞湯(另加NT$65)揀。點擊圖片放大 +6 小妹感覺肉類多到勁難揀,有自由寶貝豬(NT$380)、南投舒康雞(NT$380)、霜降雪花牛 (NT$400)、胭脂雪花羊(NT$400)、鮮物海鮮拼盤(NT$680)、招牌海陸雙拼(NT$688)... ...最後小妹都係揀咗霜降雪花牛,因為貪佢油脂含量豐富,食落肉質鮮嫩。至於主食就揀咗紫薯手工闊麵,朋友則揀咗苗栗寬冬粉。眼見蔬菜盤內五顏六色,有蕃茄、生菜、菜心、菇、木耳、紫薯、 南瓜等,望落已經食欲大增。飲品方面,我哋另外嗌咗一枝Lemonade,食住熱辣辣火鍋,飲啲開胃Lemonade,簡直係人生一大樂事!仲有是日甜品「黑糖仙草」做一個Happy Ending添! 點擊圖片放大 +6 店名:小農鍋物Farmer's Table 電話: 02 2781 9900 地址:台北市大安區敦化南路一段190巷40號 營業時間:一至四:11:30~15:00;17:00~22:00;五至日:12:00~22:00 ____________________________ (2)Under $400帝皇蟹食到飽@品火鍋 喺香港食一隻帝皇蟹要幾錢?每人唔使$1000都唔使落樓啦,就算係食幾隻蟹腳都要起碼要$200至$300,但係台灣就有一間火鍋店推出帝皇蟹任食,以NT$1390(港幣$366)嘅價錢就可以任食帝皇蟹,認真抵到爛!當然除咗帝皇蟹,蝦、肉、蔬菜等都係任添,總之你想食乜就嗌乜。 嚟到呢度,第一Round一定會畀晒成Set嘢你,例如海鮮船,入面有帝皇蟹、蝦、白蜆、斑魚、魷魚同鮑魚片,另外仲有蔬菜盤、墨魚滑、蝦滑、手製響鈴、手工肉餃、帶子甜蝦刺身、芥辣生蠔、穴子壽司、帶子壽司、牛五花同豬五花,而最特別係放喺細魚缸入面嘅生蝦,將仲識郁嘅生蝦放入個邊爐度烚,雖然有啲變態,但都好鬼正!點擊圖片放大 +7 當你食完覺得邊樣可以Encore就Encore,不過惟一係刺身同壽司唔Encore得,但冇所謂嘅,始終邊爐係主角。小妹嗌咗無數Round帝皇蟹,感覺幾新鮮,啲蟹肉唔單止唔霉,仲一梳梳、白雪雪、有彈性,老闆咁揼本,Under $400就可以食帝皇蟹食夠本,真係好值得一試!點擊圖片放大 +2 店名:品火鍋 電話:886-2-2541-1563 地址:台北市新生北路一段152號 營業時間:一至五:下午3:00-凌晨12:00,六、日:中午11:30-凌晨12:00 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331