雖然依家「師大夜市」已經變成「師大商圈」,賣衫褲鞋襪多過特色小食,不過「食好西」依然係唔少人去「師大」嘅原因,試勻師大美食嘅小妹,總結出以下三樣嘢係必食,冇食過嘅唔好話自己去過師大! (1)香濃滷味@燈籠滷味 「燈籠滷味」開業20幾年,雖然曾經有一排停業,依家仲開咗兩間分店,不過無論邊一間嘅門口都人頭湧湧!最引人注目嘅係店門口嗰個大堆頭嘅滷味材料山,各式丸類、腸類、杏鮑菇、金針菇、豆乾、小蘆筍、高麗菜、豬大腸、豬血糕、蘿蔔、海帶、冬粉、王子麵... ...想食咩就夾咩,客人夾完想要嘅料之後,就將佢交畀店員煮。點擊圖片放大 材料放入滷味汁入面淥,索晒啲滷味汁,食落每樣材料都超級香濃!小妹第一次去食,眼大肚窄,咩都夾一餐,結果夾咗兩大袋,搞到小妹要同朋友拎返酒店慢慢享用,所以建議大家「量力而為」! 店名:燈籠滷味(師大總店) 地址:台北市大安區師大路43號 電話:02-2365-7172 營業時間:一 至日15:00-01:00 ________________________ (2)惹味鹽水雞@雞房重地 「雞房重地」雖然喺成個台灣有好多分店,但係師大呢間就係始創店,主打「脆皮鹽水雞」,用鹽水熬煮台灣本地雞,搭配自選蔬菜、豆乾等滷味材料,再撒上一啲胡椒鹽同蔥薑蒜調味,食落香辣惹味,係小妹每次去台灣必食嘅小食。 點擊圖片放大 而小妹今次幫襯仲遇到老板,佢仲同小妹講嚟緊計劃喺香港開分店,不過都要考慮地點同舖租,始終香港舖租太貴,另外仲要考慮材料來源,因為台灣同香港嘅雞肉質感始終唔同,整出嚟嘅鹽水雞味道都會有出入。不過小妹覺得,香港實在太多台灣美食分店,搞到台灣美食已經唔韾香,所以如果香港開唔到都唔緊要,等小妹可以無時無刻心掛掛去台灣出走一下! 店名:雞房重地 地址:台北市大安區龍泉街 電話:N/A 營業時間:17:00-24:00 ________________________ (3)香甜蕃薯波波@搖滾地瓜球 小妹食過數個夜市嘅蕃薯波波,惟獨師大嘅最大粒最香脆,粒粒金黃色熱辣辣,外面脆口,裏面鬆軟,令人忍唔住食完一粒又一粒,所以大家去到師大,一定唔好錯過呀!由於佢係即叫即炸,而且炸嘢又需時,所以大家要耐心等候呀!始終好嘢係要等嘅!點擊圖片放大 店名:搖滾地瓜球 地址:師大流動攤檔 電話:N/A 營業時間:16:00-23:00 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331