最近元朗最矚目嘅事,莫過於大型商場開幕,小妹為咗湊吓熱鬧,都去兜返轉,見各間食肆相繼插旗,預計到呢度將會成為開飯勝地。當日小妹試咗喺港九新界都有分店嘅中價餐廳「北京樓」,感覺都幾值得推介,尤其係一家大細,扶老攜幼嘅大家庭,原因係因為餐廳主打中菜,清淡味濃都有,嗌餸食飯,最啱老人家。 小妹對京菜嘅刻版印象,就係烤鴨,不過是日朋友喉嚨痛,與烤鴨無緣,惟有食得清淡啲,估唔到啲餸一啲都唔覺得淡而無味,反而清淡得嚟帶鮮味,完全同我印象中嘅濃味京菜有好大反差。 「賽螃蟹」可以話係比較清淡嘅京菜,相傳清代慈禧太后有一日突然想食蟹,但因為北京係內陸地區,一時三刻根本搵唔到蟹畀佢食,御廚靈機一動,就用蛋白扮蟹肉,慈禧太后一試愛上。原本以為呢度只係用雞湯為蛋白提鮮,實則加咗蟹肉同瑤柱,令蛋白充滿海鮮味,本來扮晒蟹嘅賽螃蟹,依家竟然真係有蟹,味道反而更優勝。 「上湯茶樹菇小豆苗」係我比較鍾意嘅中菜時蔬,雖然無從考究係京菜定係滬菜,但無論食京菜定係上海菜都會見到佢嘅蹤影。鍾意嘅原因係小豆苗天然嘅草青味對我嚟講係一種吸引力,就好似我對西芹、莞茜嘅喜愛一樣。用上湯煨出嚟嘅小豆苗爽口又略帶青澀,食落輕掛上湯,清爽中帶點濃郁嘅味道。 相信好多人都以為「淮揚小籠包」係上海嘢,實則佢係源自北京嘅灌湯包,所以北京可以話係佢嘅鼻祖。朋友鍾意食小籠包,於是特別「柯打」一客,一籠四件,兩個人食啱啱好,只係其中一個賣相特別,潮用Super Food紅菜頭汁液整成包皮,紅卜卜咁,非常搶眼!不過小妹覺得包皮太易穿,所以夾嘅時候要小心。 大家都知道北京六必居係一間著名嘅中華老字號醬園,由明朝嘉靖九年(1530年)開始已經經營,最出名係自家秘醬同醬菜。今次雖然食唔到烤鴨,但係都想食吓啲要落手落腳包嘅菜式,而呢個用六必居醬撈成嘅醬肉,味道微濃,但係甜甜哋非常開胃,用人手搓嘅粉皮包住濃甜嘅醬肉,簡直就係一份惹味嘅中式手卷。 點擊圖片放大 甜品方面,侍應特別推介「拔絲香蕉」同「豌豆黃」,但小妹對豌豆黃一啲好感都冇,只因北京食過,滿口粉狀物同死甜,留低壞印象,唔明慈禧太后點解咁鍾意食,但侍應話呢度嘅豌豆黃係用豌豆磨粉製成糕狀,同直接粉狀上唔同,果然,淺黃色冰糕食落細膩清甜,冰冰凍凍,夏天食非常啱! 而「拔絲香糕」就用咗比較複雜嘅做法,一般餐廳係將香蕉炸咗之後,再用糖漿拌勻上枱,但呢度會做多一個步驟,就係放入冰水入面迅速降溫,令糖漿凝結成冰糖狀,令質感外脆內軟,外冰內熱,雙重口感,小妹一試愛上。點擊圖片放大 +3 店名:北京樓 電話:2259 3218 地址:元朗元龍街9號形點一期2樓2061-2062號舖 營業時間:星期一至日11:30-22:30 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331