以擔仔麵起家嘅台南度小月,日前終於落戶香港,聞說排隊至少要排成個鐘,不過小妹喺星期日Lunch到訪,只係排咗半個鐘到就食到,認真開心! 對上一次食度小月「擔仔麵」,已經係幾年前去台灣旅行嘅時候,當時唔識嘢,覺得碗麵好細,幾啖就食晒,好似好唔抵食,但就畀佢嘅味道吸引,麵身彈牙唔過腍,肉燥甘香不膩,蝦肉新鮮爽口,估唔到細細一碗都咁高質,百年承傳(源起於1895年)一啲都唔少嘢! 擔仔麵 估唔到嚟到香港開分店,質素依然冇變,麵身繼續煙韌有致,每一條麵都細緻分明,麵嘅Size唔會過粗,又唔會過幼。肉燥亦同樣甘香豐腴,食落唔會有油膩感。而蝦肉爽口彈牙,同一般香港餐廳用嘅雪藏蝦相比,台灣人實在用心。 不過最驚喜嘅係小炒,小妹同朋友想食「鳳梨蝦球」,覺得夏天食啲酸酸甜甜嘅嘢會開胃啲,於是就叫咗一個「鳳梨蝦球」,諗住係小炒,一定同平時食到嘅菠蘿生炒骨差唔多,點知一上枱,真係嚇一跳,以為去咗食泰菜,「鳳梨蝦球」居然係串燒咁上,仲要插喺個菠蘿殼上面,呢個Presentation認真有驚喜!小妹興奮地拎起一串,點咗附上嘅秘製菠蘿汁沙律醬,炸咗嘅蝦球爽口彈牙,配上甜甜酸酸嘅菠蘿汁沙律醬,非常清新滋味,食多咗一啲都唔覺「漏」。小妹我平時都幾驚食菠蘿,因為怕酸,不過呢度嘅菠蘿居然清甜到一個極致,忍唔住真係食多幾串! 鳳梨蝦球 食過台灣菜嘅人一定好熟佢嘅湯品,好似白玉苦瓜排骨湯、蚵仔湯、鳳梨苦瓜湯咁,而小妹頗鍾情度小月嘅「溫泉絲瓜蛤蜊湯」,絲瓜爽口清暑,蛤蜊肥嫩飽滿,湯底清清哋,拌啲薑絲,夏天送飯一流! 溫泉絲瓜蛤蜊湯 同台灣一樣,門口都有師傅即場整麵 點擊圖片放大 店名:度小月 電話:8300 2001 地址:尖沙咀廣東道17號海港城海運大廈LCX3樓31號舖 營業時間:星期一至日12:00-22:00 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331