前幾日落戶香港嘅九州宮崎日式居酒屋塚田農場Tsukada Nojo,似乎唔見傳媒大鑼大鼓宣傳,咁啱小妹同朋友去尖沙咀行街,行到攰想搵間餐廳坐吓、食吓嘢,Search附近有咩食,就畀我發現呢間啱啱開業嘅「過江龍」,於是就去試吓。 餐廳位置比較隔攝,喺商場入面嘅郵輪碼頭離境區附近,一般好少人途經呢度,所以人流比較少。一入門口,最吸引我嘅係一大片落地玻璃,成個維港景色盡收眼簾,摩天輪同國金等建築都清楚可見,簡直係餐廳最完美佈景! 本來想試吓主打嘅美人鍋同精緻下午茶,但因為小妹同朋友都減緊肥,加上唔係太肚餓,所以就叫咗幾樣小食過吓口癮。其中「美人卷盛合」非常特別,$128就可以任揀Menu入面三款美人卷,所謂嘅美人卷,係用類似越式米紙包住日式材料同蔬菜,小妹揀咗鰻魚忌廉芝士美人卷、三文魚牛油果美人卷同海老牛油果美人卷,由於主打健康食物,蔬菜比例較多,三款嘅味道都屬清淡,非常適合減緊肥嘅女仔。三款美人卷都會配一個秘製醬汁,呈現出不一樣嘅風格同味道。 美人卷盛合($128) 三文魚牛油果美人卷 海老牛油果美人卷 鰻魚忌廉芝士美人卷 而最特別嘅係,店內嘅即製沙律,有專人即場喺隔雜炮製畀你食,小妹只係試過食即場片出嚟嘅烤鴨,但即場整嘅沙律真係第一次見,如果大家想睇整沙律表演,呢個值得推介。小妹嗌咗個「三文魚牛油果沙律」,入面有牛油果、生菜、西蘭花、彩椒、杏仁、薏米同三文魚,材料豐富,配搭健康。點擊圖片放大 三文魚牛油果沙律 最後就係「雞白湯柚子鹽拉麵」($93),眾所周知,「塚田農場」最出名日本走地雞菜式,而佢嘅雞骨湯底更加係鎮店之寶,小妹個胃唔夠試美人鍋,就惟有試吓佢同樣用大量雞骨熬製八個鐘嘅雞白湯拉麵。拉麵一上枱,就見到「傑」身嘅奶白色湯底,擺咗唔夠兩分鍾,湯底就結咗一層薄衣,於是立即舀咗一羹放入口,香濃幼滑嘅雞湯迅即滑入喉嚨,飲完之後,雞湯會微微「漿」住個口,可見骨膠原成份超高!因為湯底加入咗柚子鹽同柚子皮,飲多咗唔會覺得太「漏」,所以小妹好快就KO咗碗湯同麵! 雞白湯柚子鹽拉麵($93) 綜觀嚟講,食物質素同環境都可以達90分,但惟一有待改善嘅係服務方面,首先,店內卡座已滿,侍應首先安排嘅吧枱座位,竟然係靠近收銀枱處,每次收拾其他枱面後嘅毛巾、水壺、水杯、杯墊、碟等都放喺呢個位附近,喺衛生情況上面睇,呢個似乎唔係最佳位置。其次,侍應應承卡座有位後便安排我入座,但一直冇跟進,而係不斷安排後嚟嘅客人入座,雖然我冇乜所謂,吧枱啲櫈都舒服,但似乎以日式餐廳嚟講,細心欠奉。餐廳啱啱落戶香港,若只著重食物同環境並唔足夠,服務同客人感受同樣重要,希望餐廳可以喺呢方面作出改善,吸引更多客人光顧。 店名:塚田農場Tsukada Nojo 電話:2467 0777 地址:尖沙咀廣東道17號海港城海運大廈2樓OTE 202號舖 營業時間:星期一至日12:00-23:45 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331