相信每個女仔屋企張床至少都收埋一隻「奸夫」﹗佢軟腍腍,大大隻,鍾意攬住瞓又得,鍾意用腳夾住瞓又得,鍾意「擇」住瞓都得,總之搓圓撳扁都冇問題,我所指嘅唔係偷情嗰啲奸夫,而係人稱「奸夫公仔」嘅宇宙人——Craftholic﹗好多女仔都對佢為之瘋狂,但如果可以成間屋都佈滿晒「奸夫」就好喇,不過以香港間豆腐潤咁細嘅房嚟講,根本冇可能,所以如果有間舖可以日日打疐,畀奸夫包圍住就已經好滿足喇﹗ 成牆都係「奸夫」,真係好瘋狂,我講緊我呀﹗ 呢間位於台北東區嘅宇宙人Café,就可以滿足一眾欠缺「奸夫的愛」嘅女仔喇﹗大大間舖,幾百款「奸夫」仔佈滿成間舖頭,真係可以媲美博物館﹗店內仲供應以奸夫公仔為主題嘅創意料理同甜品,每一款都離唔開奸夫個「嘜頭」,真係好有愛呀﹗ 朱古力味Cup Cake 雲呢嗱味Cup Cake 小妹試咗佢嘅Signature Cup Cake,大大塊奸夫「嘜頭」餅乾插喺Cup Cake上面同你Say Hi,真係唔捨得食落肚呀﹗Cup Cake分為雲呢嗱味同朱古力味,味道經過調校,冇傳統Cup Cake一味死甜,而係微甜易入口,所以食多兩個都唔會覺得漏﹗ 葡萄柚冰果茶 杯緣子勁得意 由於每位客人都必須嗌一杯嘢飲,所以一定要試佢嘅冰凍果茶,皆因有紀念品奸夫公仔杯緣子送,$160台幣 ( 約$43港紙) 有杯嘢飲,再送埋一隻價值$100台幣(約$27港紙) 嘅奸夫公仔杯緣子,你計吓條數都知點樣最抵啦﹗ 店入面見到好多以前錯過咗、冇買到嘅公仔,諗住可以同舖頭高價收購,點知店員話全部都係非賣品,除咗禮品櫃入面嘅新款,唉... ...惟有喺Cafe坐多一陣,有「奸夫」陪我食個Tea都好心滿意足喇﹗點擊圖片放大 店名:宇宙人主題餐廳 CRAFTHOLIC Café 電話:0227781569 地址:大安區光復南路280巷28號1樓 營業時間:11:00-22:00 歡迎到本人的個人專頁及網站瀏覽: Blog: https://blog.ulifestyle.com.hk/blogger/shinysharon/ Facebook: https://www.facebook.com/hongkonggirl331