秋風初起,不禁令一眾老饗食念大動,蛇羹、大閘蟹傾巢而出,胃食之人又點會抵受得住誘惑,紛紛放開肚皮儲肥自己,反正冬天之後大褸一著,咩鬼祟肉都睇唔到,到咗明年春夏又係一條好漢! 話說早前小妹見沙田帝都酒店嘅帝玉庭推出咗任食大閘蟹,嗜蟹如我當然要相約好友擦番餐勁嘅,加上價錢都算合理,$500到就可以4個鐘(6:00-10:00)任食4款大閘蟹,小妹當然唔可以錯過! 每隻蟹都有3-4両,以太湖蟹來說,質素是中上。 其實剩係食清蒸嘅大閘蟹真係有啲悶,小妹較欣賞酒店創意,推出伯爵紅茶、麯酒浸同黑松露四款,個人比較鍾意伯爵紅茶同黑松露兩款,前者蟹肉滲有淡淡茶香,令蟹肉冇咁單調;後者比較重口味,似中式炒蟹,但黑松露醬惹味鮮香,同大閘蟹肉嘅鮮甜同蟹膏嘅香濃毫無違和感。小妹反而唔太鍾意麯酒浸,一來係凍食,二來蟹肉畀酒味嚴重蓋過,難以發揮蟹嘅鮮味,加上蟹膏早已被麯酒浸透,想食豐腴膏香似乎唔係最佳選擇,一隻起兩隻止已經夠數。 成個蟹蓋都係膏,真係要大啖大啖咁食! 蟹身嘅蟹膏份量都不相伯仲! 是次小妹食咗12隻,平均每隻計起都係$42,真係超級抵!聽聞有人可以一次過食到20隻,即係平均每隻$25,出面真係買唔到,如果你唔驚膽固醇爆標嘅話... … 每位客人均送一客「蟹肉雞蓉雪燕羹」,個人覺得只係生粉水,唔太好食。 每人仲有薑汁陳醋同一杯薑茶送,驅害之最! 店名:帝玉庭 電話:2694 3939 地址:沙田白鶴汀街8號帝都酒店1樓 營業時間:星期一至五: 09:00-15:00, 18:00-23:00; 星期六、日及公眾假期: 09:00-16:00, 18:00-23:00 Facebook:https://www.facebook.com/hongkonggirl331/ Instagram:http://www.imgrum.net/user/hongkonggirl331/2549505907