總覺得台灣嘅人情味特別濃,記得嗰一年冬天同友人到台灣旅行,到十分遊玩時恰巧遇到大雨,要知道天氣凍又遇上大雨,更加係雪上加霜,又凍又餓嘅我哋隨便搵咗間唔起眼嘅舊式小店食嘢,順便避雨,小店老闆娘即刻熱情款待,送上專賣嘅肉燥飯同鳳梨苦瓜湯,雖然只係周圍都有得食嘅台灣傳統小食,但嗰種古早滋味,會令你一生難忘! 返到香港之後,好難再搵到有古早味嘅台灣食店,惟喺朋友嘅介紹之下,先搵到呢間隱世「台食店」!位於太子荔枝角道嘅「好媽媽台灣館」,看似同一般香港晚市茶餐廳無異,如果唔係有台灣兩個字,睇怕難以引人注目。但小妹我從來唔係只睇外表嘅人,如果佢真係能夠做到我想要嘅古早味,就算門面幾普通,都係值得推介。 肉燥飯 如果話肉燥飯係台灣美食嘅靈魂,一啲都冇錯!台灣每間店都有自己一套永不外傳、製作肉燥嘅獨門秘方,由外婆、外外婆、外外外婆傳到呢一代,古早味自然由此而來。「好媽媽」嘅肉燥飯自然係遵從「古方」,半肥瘦豬肉經過人手剁成肉粒,再以秘製醬汁滷煮,味道總跟從傳統,煮透嘅肉燥入味香腍,淋喺熱辣辣嘅飯上面,每一口都精彩絕輪,再配一兩片燙椰菜同半隻滷蛋,香、軟、濃嘅滋味,就係傳統台灣媽媽嘅味道! 三杯雞髀菇 台灣三杯雞我就食得多,三杯雞... ...髀菇就真係冇食過,一杯酒、一杯豉油、一杯麻油,再加少少冰糖將冇味嘅雞髀菇煮得軟透,索晒汁醬嘅精華,再以九屠塔帶出獨特鮮味,講話食落似食緊三杯雞真係有啲過份,只能話將雞髀菇嘅質感同味道提升,始終雞同菇嘅口感相差太遠,能夠做出味道已足夠。 麻油雞跟套餐,有飯,仲有肉燥燙青菜 聞說麻油雞係台灣女人坐月時嘅補品,每個人屋企嘅老人家總有一套拿手好戲,大廚先將土雞切塊出水,再以麻油爆香薑片,放入雞塊,倒入米酒、冰糖以大火煮滾,後以細火燜煮九個字,咁樣煮出嚟嘅雞又入味又唔會太「鞋」口。為咗加強米酒香味,坊間一般都會喺上枱前加入米酒,但小妹覺得咁樣太Over,會蓋過雞湯嘅清香,幸而呢度冇咁做,完全遵從一般家庭嘅做法,因為所有奶奶都唔會想灌醉生過小寶寶嘅家嫂! 鳳梨苦瓜湯 鳳梨苦瓜湯係小妹每次去台灣必食嘅小食次一,記得第一次飲嘅時候就覺得係驚世大發現咁好飲,因為估唔到菠蘿同苦瓜係咁夾,清甜又隱隱回甘,非常過癮!「好媽媽」嘅湯同台灣一樣用燉盅盛載,但小妹直覺佢唔係好似台灣咁燉出嚟,因為味道同質感稍有偏差,加上唔係用白玉苦瓜,自然苦味會有啲重,幸而小店用大量菠蘿挽回清甜味道,飲落先唔會太難受,呢個湯要燉得好飲,並非易事! 食完飯會送上蕃薯紅豆沙一碗,相信只有台灣人先咁有人情味! 小店同一般香港晚市茶餐廳無異 店名: 好媽媽台灣館電話:2330 3330 地址:太子荔枝角道100號金鳳樓地舖 營業時間:星期一至五: 11:30-16:00、18:00-22:30;星期六、星期日及公眾假期: 11:30-22:30