話說早排小妹打咗篇有關韓國美食嘅Blog,重溫番三清洞Mukshidonna嘅芝士年糕鍋,真係超級心癢癢,好想即刻飛去韓國三清洞食,但知道佢舊年喺旺角同銅鑼灣都開咗分店,未能立即起行嘅我就即刻相約好友去就近嘅旺角分店解心癮。 位於旺角彌敦道嘅Mukshidonna,係喺香港開嘅第一間分店,以特許形式經營,店舖同韓國Menu一樣都係以年糕鍋做主打,分別有芝士、海鮮、烤肉、部隊同雜菜五款選擇,客人可以先揀年糕鍋款式,再揀麵嘅種類(如拉麵、韓式粉絲及烏冬)同其他配料(如午餐肉、魚餅、餃子),不過小妹覺得以上唔加都OK(講笑),芝士一定要追加!皆因想啲湯底更順滑香濃唔死辣,再睇埋扯絲效果集埋郵呃Like,芝士就係主角!就算你話太邪惡、係減肥人士天敵都係咁話! 材料超多超豐富!!! 芝士先係主角!!! 香港分店嘅年糕鍋,味道其實同韓國有少少分別,韓國版除咗辣仲會有甜味,但呢度嘅甜度會低少少,辣勁適中,較符合香港人口味。年糕同韓國版一樣煙煙韌韌,索滿香濃湯汁,惹味有咬口。鍋入面嘅材料同韓版一樣都係以大堆頭上枱,完全冇打釜頭,食到我捧住個肚走。同場有好多人會追加炒飯,但由於我同朋友嗌咗兩個麵,個胃實在塞唔落,所以就算數,下次多啲人一齊嚟嘅時候先再追加炒飯啦! 順帶一提,老闆超Nice,知道我係Blogger,仲同我傾咗一陣偈,交換吓卡片咁,食餐飯又可以做文化交流,呢餐飯超級抵! 店名:Mukshidonna 電話:5573 9331 地址:旺角彌敦道 726 號 1 樓 營業時間:星期一至日: 11:00-15:30, 18:00-23:00