香港有好多西班牙餐廳,有被列入米芝蓮嘅星級飯堂,有連鎖品牌嘅大眾級食店,亦有嬴盡口碑嘅隱世小店,每種西班牙餐廳都有一班忠實擁躉,但要喺眾多嘅西班牙餐廳入面突圍而出,實在不易! 門口都幾神秘 位於上環永樂街嘅La Postre,都係主打西班牙菜式,海鮮飯、蒜片大蝦、各種Tapas... ...只要講得出嘅菜式都有,但得呢啲又點會輕易獲取食家嘅歡心?作為樓上舖嘅佢,就喺甜品度落手,將甜品變成Magic!而Sexy Six($208)就係佢嘅主打甜品,究竟呢個甜品有幾Sexy? Sexy Six($208) 雜莓芝士餅 香蕉布朗尼 紅豆抹茶蛋糕 雜果白酒啫喱 蘋果金寶 士多啤梨忌廉 話明係「Six」,當然有6種唔同嘅甜品,分別係雜莓芝士餅、香蕉布朗尼、紅豆抹茶蛋糕、雜果白酒啫喱、蘋果金寶同士多啤梨忌廉,將6種唔同嘅甜品放入香檳杯,非常Elegant!咁究竟個Sexy位喺邊?就係佢其中三樣甜品會有酒嘅成份,不過店員唔會話你知邊個有酒嘅成份,要你自己估,所以食食吓醉咗都唔知!個雜果白酒啫喱就好明顯係啦,另外兩樣小妹都係估估吓,我估應該係香蕉布朗尼同蘋果金寶,不過店員聽完只笑不語,咁神秘迷人,難怪會叫「Sexy」! 除咗甜品,當然仲有其他美食值得推介,醬汁極香濃嘅芝士龍蝦忌廉意粉($138)非常得我歡心,意粉索晒芝士龍蝦汁不在話下,小店毫不吝嗇用上半隻新鮮龍蝦,用芝士將之烤焗,非常入味。 芝士龍蝦忌廉意粉($138) 香蒜白酒青口($168)味道比較清淡,同濃味嘅龍蝦意粉係個大對比,但正好作為一個緩衝,清清味蕾,但個人唔太鐘意佢用大隻嘅青口,因為肉質較「鞋」口,相反,如果係用細隻嘅澳洲藍青口會更佳。 香蒜白酒青口($168) 至於黑松露薯條($58)不過不失,不過盛載嘅器皿係個小鐵桶,都幾得意! 黑松露薯條($58) 店名:La Postre 電話:2668 5802 地址:上環永樂街50號昌盛大廈3樓 營業時間:星期一至日: 12:00-23:00