身處香港,度度都人多車多,想搵個靜啲嘅地方Relax吓都難,雖然Cafe開到成行成市,但係都難逃排隊同人逼嘅命運。話說小妹喺過去嘅周末幫襯咗間環境清幽嘅餐廳,人唔多,但食物卻極具水準,享受咗個寧靜嘅晚餐。 位於尖沙咀彌敦道嘅 R & B,係餐廳Apple Green嘅副線,R & B係Research同Bakery嘅縮寫,意即不斷鑽研新菜式,雖然店舖開咗好耐,已經唔係咩新鮮事,而大部分人亦轉頭Cafe懷抱,對餐廳人流會有啲影響,但對於一啲想食餐「安樂茶飯」嘅人嚟講,呢度係個唔錯嘅選擇。 餐廳設於大平洋大廈三樓,行入餐廳,首先關注嘅係一片落地大玻璃窗,店員會首先安排客人坐景緻最好嘅靠窗位置,而小妹亦有幸坐到呢個位,可以睇吓窗外人來人往嘅馬路同車,見到出面嘅事物忙忙碌碌,但自己就超級輕鬆,呢個感覺好正! 聞說呢度有個漢堡餐叫「Billionaire」($188),係店內大熱,材料豐富,每個漢堡都用上80安士嘅純黑安格斯牛排同30安士嘅鵝肝醬,再配上煎蛋、牛油磨菇、哥根蘇拿芝士脆片同24個月嘅黑毛豬火腿,用自然發酵嘅法式牛油麵包夾住,口感層次分明,每咬一啖,肉汁都會爆發性瀉出,雖然極有罪惡感,但係食Burger就係要有呢個感覺!伴碟嘅仲有沙律同黑松露薯條,可以去除少少罪惡感。 Billionaire($188) 小妹鍾情龍蝦汁意粉,「Crab & Shrimp」($112)正合我意,餐廳以Rock Shrimps、藍蟹Mascarpone、藏紅花油漬蕃茄、三文魚子同龍蝦濃湯入饌,Rock Shrimps嘅味道同質感與龍蝦相似,比較爽口結實,大廚仲輕撰科尼亞克白蘭地調味,令成個醬汁更香濃,煙韌嘅意粉索晒龍蝦濃湯,每啖都係一個大滿足。 Crab & Shrimp($112) 甜品「-18C Pina Colada」($68)都好有創意,平時飲 Pina Colada就飲得多,要將佢變成甜品真係第一次聽,大廚將椰子汁同椰子肉加入冧酒打成芭菲,放喺冰菠蘿同親自焗製嘅椰子蛋糕上面,一凍一熱嘅配搭,同心太軟配雪糕有異曲同功之妙。 -18C Pina Colada($68) 飲品方面以Fresh為賣點,「Pineapple Mojito」($52)係無酒精Cocktail,杯入面有菠蘿冰、青檸同薄荷葉,而銅壺入面嘅係冰凍嘅菠蘿汁,想飲嘅時候先倒入杯中,由於冰係由菠蘿汁雪成,所以飲品飲到最後都唔會變淡,非常貼心!至於「Lemongrass and Ginger」($34)以檸檬汁同薑啤調製而成,酸酸甜甜,醒神又開胃,好啱夏天飲! Pineapple Mojito($52) Lemongrass and Ginger($34) 餐後會附送糖漬橙片做甜品,雖然係連橙皮一齊醃漬,但一啲都唔苦澀,微甜清新整頓味蕾,為成個晚餐畫上完美句號。 糖漬橙片(Free) 愈入夜,餐廳人數會愈多,奇怪嘅係,大家都會放低音量享受晚餐,令我可以靜靜哋食個晚飯,呢個感覺真係好正! 店名:R & B Research Bakery 電話:2191 5445 地址:尖沙咀彌敦道172-174號太平洋大廈3樓 營業時間:星期一至日: 12:00-22:30