一年前韓國勁興食海鮮九層塔,個個都同高過自己嘅蒸塔集郵威威,可惜潮流呢樣嘢同寵物小精靈嘅火箭兵團一樣都係來去如風,當香港不停緊貼韓流食海鮮塔嘅時候,韓國嘅Oppa同韓妹已經食緊海鮮鍋喇! 咁大個鍋,究竟我食唔食得晒架? 呢個直徑接近60cm嘅海鮮鍋可以話係鍋物中嘅巨無霸,鍋中物全部都係時令海鮮,而且全部都由釜山直送,鮑魚、花蟹、帶子、大蜆、扇貝、青口、 魷魚、八爪魚等鋪滿成個鍋,十幾款海鮮一次過Show Time,小妹我咁大女都未試過一次過食咁多海鮮!呢個海鮮鍋嘅湯底由海帶、蘿卜、 洋葱同胡椒熬成,將海鮮鮮味完全帶出之餘,仲一啲都唔腥。 個鍋超級大呀!!媽哩媽哩Home,啲海鮮快啲熟晒畀我食啦! 喺等啲海鮮熟嘅期間,老闆送上剪蛋、豆腐同金針菇等小食,等你食住等,超貼心! 熟喇熟喇!熱氣騰騰勁似打邊爐! 貴妃蚌都係巨無霸 啲帶子成隻手掌咁大呀!!! 話說啲青口同蜆鋪滿晒個鍋底,有圖有真相! 韓國啤酒一定要嗌啦,個人覺得Hite比Cass好飲。 啲殼裝滿晒個垃圾桶呀!啲海鮮有幾多?你話呢! 話說小妹同好友嗌咗一個中Size嘅海鮮鍋「些牙」,價錢都係W48,000,大概係港紙$360到,真係抵到爛!如果喺香港食,冇過千都唔使落樓!話說韓國近海,香港又近海,點解喺西貢、流浮山食海鮮會畀人割到一頸血,但係喺韓國食海鮮就可以食到回本咁嘅(好似係)? 價目表: 小W38,000(1至2人) 中W48,000(2至3人) 大W58,000(3至4人) 特級W63,000(4至6人) ******後記****** 如果唔夠食,最後可以加個刀削麵,但由於小妹實在太飽,所以都係放棄。題外話,老闆同店員雖然唔識講國語,但英文就Lak Lak聲,所以同佢溝通完全冇難度! Sug-ine Jogaejeongol 地址:首爾市九老區九老洞 30-32(新道林站3號出口) 電話:+82(0)2-861-6522 營業時間:5:00 pm – 2:00 am