提到元朗最出名嘅茶記冰室,不得不提位於元朗屏山嘅「華嫂冰室」,雖然「華嫂」早前已喺觀塘插旗,但小妹始終覺得喺總店食先最有風味,正如食葡撻要去澳門而唔係香港KFC一樣,要食就一定要去總店,咁樣先可以食到「真.風味」! 「華嫂」無論幾時都咁多人,各位記得攞定籌先呀! 早前小妹一盡地主之宜,帶一位住喺沙田嘅朋友入屏山食「華嫂」,話說我呢位朋友食好嘢無數,但竟然連「華嫂」係乜都唔知,嚇到我個心當堂離一離,如果佢之後唔係因為有個Project跟身做Research先知道「華嫂」嘅存在,我真係唔肯定佢係咪地球人,所以唯有做吓好心帶佢「見識」一下,試吓「華嫂」手勢。 極邪惡「招牌菠蘿包」,$16就有咁多料,出面茶記搵唔到喇! 「華嫂」最馳名係個「招牌菠蘿包」,佢出名嘅地方係個包新鮮出爐熱辣辣,外層烤到微微焦糖色,店員會先將個包打橫劏開一半,然後夾入蕃茄、芝士、煎蛋同牛油,個包咬落去脆卜卜之餘又唔會過甜,菠蘿包裡面嘅蛋漿會喺口入面瞬間爆發,再加埋牛油芝士香同蕃茄中和膩感,連我個朋友都食到舔舔脷!小妹試過好多有餡嘅菠蘿包,例如紅豆蓉、奶黃餡,但始終覺得甜撞甜嘅組合太甜膩,所以我覺得「華嫂」好有腦,用甜嘅包撞鹹嘅餡,互相中和之餘,味蕾都可以喺同時間獲得唔同滿足,所以呢個包真係抵佢出名! 鮮茄豬排雞翼通粉($41) 如果各位老饗或者「華嫂」熟客都已經食過呢個包N次,咁不如試吓佢嘅麵食,個人覺得佢嘅「鮮茄豬排雞翼通粉」都唔錯,講起「茄通」,大家一定會諗起中環嘅「勝香園」,但係「華嫂」嘅都唔差,雖然搭啲燒汁雞翼、香茅豬排似車仔麵,但係材料都醃得香腍入味,加上份量充足又茄味香濃,一個大男人一定夠食有餘! 前:冰花奶茶($19)後:凍檸檬益力多($16) 不過呢度嘅嘢食唔跟嘢飲,要另外嗌,係有啲唔係幾符合大家嘅經濟原則,不過難得食「華嫂」,嗰雞碎咁多就豪畀佢啦!冰花奶茶係必嗌,香濃奶茶加碎冰,你以為冇特別,其賓呢啲先係食茶記嘅浪漫,玩得花臣就去食連鎖快餐店啦!要記住沖一杯普通得嚟又好飲嘅奶茶一啲都唔易,加埋碎冰飲半個鐘都唔淡味就難上加難!所以唔好同我講想飲出甚麼特別來,識飲一定係飲背後嘅工夫!如果帶住小朋友嚟,可以嗌一杯凍檸檬益力多,其實都係冇特別,得益力多味,不過係加大版嘅益力多,酸酸甜甜氹吓啲小朋友,佢哋實唔會扭計。 雖然以上食物觀塘「華嫂」都有得食,但小妹始終覺得位處近郊嘅屏山「華嫂」略勝一籌,皆因呢度空氣清新,附近又有屏山文物徑、鄧氏宗祠、聚星樓等嘅文物古蹟睇吓,一邊呼吸大自然同鄉郊氣息,一邊歎「招牌菠蘿包」同「冰花奶茶」,真係人生一大樂事!平日喺市區做嘢已經好辛苦,如果假日仲要入工業區,又真係有啲難頂,所以小妹比較鍾意去總店,感受一下食「華嫂」嘅浪漫! ***後記*** 其實想食元朗「華嫂」真係要做定一啲功課,例如搵定路線圖啦!話晒都係喺鄉郊地區,九曲十三彎,睇清楚Google Map點行,就唔使行咁多冤枉路;如果你自認好懶,連Google Map都費事睇,又或者好蠢,唔識睇Google Map,去到不彷問吓人,元朗人熱心又Nice,分分鐘好過睇Google Map。 其二,「華嫂」星期日唔開,冇錯!係星期日,竟然喺人流最多嘅時候唔開,所以,建議你星期六去,星期日留喺屋企Hea都唔好出嚟食華嫂,如果唔係等食「門釘」! 其三,就算營業都要睇清楚開放同落場時間,8點前、1點至2點、5點打後都唔會開,麻煩各位醒醒豬喇! 店名:華嫂冰室 電話:2617 2232 地址:元朗屏山坑頭村 營業時間:星期一至六:08:00-13:00;14:00-17:00、星期日休息