近日天氣突然轉涼,小妹覺得食星馬菜就最好不過,皆因喺寒風凜凜之下嚟一煲熱辣辣嘅肉骨茶,真係暖胃又補身! 肉骨茶喺新加坡同馬來西亞都大行其道,新加坡嘅肉骨茶所用嘅藥材較少,所以湯嘅顏色較淺,但由於會加胡椒同蒜頭,胡椒味較重,湯底微辛得嚟較香濃,除咗用大排骨熬製,仲會加豬嘅內臟;至於馬來西亞嘅肉骨茶就會加好多藥材,當歸、淮山、何首烏、龍眼、杞子、紅棗就一啲都唔會少,所以中藥味相對較濃,湯呈深色,不過選用嘅排骨會較細同嫩,易入口。而位於大坑浣紗街嘅呢間「肉骨皇」,正正就係後者,喺大坑呢個美食臥虎藏龍之地插旗多年仍屹立不倒,就知佢嘅Bak Kut Teh(肉骨茶)有幾正宗有幾勁! 肉骨茶用煲仔上,滾吓滾吓,食極都仲熱辣辣! 檳城肉骨茶(細)$88 睇開小妹嘅Blog,都知我對藥膳情有獨鍾,而呢間店舖主打嘅「檳城肉骨茶」當然係我必試之選,由於佢分大同細版,小妹同朋友兩個人自然嗌一個細版啦!落「柯打」之後,店員會先置一個爐,然後就將已經準備好嘅一煲肉骨茶放喺火爐上滾呀滾,讓客人無論幾時食都係熱辣辣,認真貼心! 打開個蓋真係「嘩」一聲!材料多到滿晒出嚟! 其實呢個肉骨茶嘅背後絕對花功夫,首先材料就有十二種,除咗以上講嘅六種之外,仲有黑棗、甘草、沙參、玉竹、川芎同玉桂,之後就熬足四個鐘變成湯底,而每日又會加入排骨熬六個鐘,將排骨煲到又軟又腍,吸收晒香濃嘅中藥,而肉嘅精華又會滲透到湯入面,令湯底更鮮美,所以飲落鮮甜唔膩,層次豐富!餐廳同時亦會奉上油條粒,跟足馬來西亞食法。細版嘅湯對兩個人嚟講綽綽有餘,加上湯入面除咗肉排之外仲有豆卜、金菇、腐皮同冬菇,所以唔使加飯都夠食,但係如果四個人嘅話就最好叫大版,夠食之餘亦會抵啲! 當然小妹唔係齋食肉骨茶就飽,知道呢度有螄蚶食,當然亦要嚟一客。其實好多人都唔鍾意螄蚶,因為覺得佢紅卜卜好似血咁,食落又好似有啲血腥味,所以好抗拒,但其實煮熟啲嘅話一啲都唔會有呢個問題,當然大前提係要新鮮啦!據聞呢度嘅螄蚶係泰國每日新鮮運嚟,所以可以好安心咁食,點啲特製醬汁都幾惹味。不過小妹同店家喺「幾多成熟」呢個概念上有啲出入,皆因小妹本來叫白灼五成熟,點知佢攞到嚟同生嘅冇分別,好彩佢都肯再灼熟啲,服務態度可嘉! 亞囉螄蚶 $88 咖喱大頭蝦 $168 小妹另外又嗌咗樣「咖喱大頭蝦」,純粹攝吓位、戥吓腳,咖喱味濃郁,蝦嘅肉質爽口彈牙唔會霉,味道都OK,但仍不及肉骨茶消魂蝕「骨」。 店舖裝修簡潔俐落 是日推介 店名:肉骨皇Bak Kut King 電話:2972 2266 地址:大坑浣紗街45號浣紗花園地下1號舖 營業時間:星期一至日: 12:00-15:00、18:00-23:00