香港人似乎特別鍾意食雪糕,無論係連鎖快餐店嘅麥X風,定係Super Market同便利店均有代售嘅港牌平價Drumstick,又或者係意大利雪糕店嘅高級Gelato,香港人都絕!不!放!過!皆因每一口冰凍背後有住千變萬化嘅滋味,溶於口,甜於心,怎不心醉?小妹亦極鍾情雪糕,尤其對有脆筒嘅情有獨鍾,有時會因為突然想食脆筒而買,主角非雪糕,就將雪糕留畀另一半,自己享受脆筒,極度任性!不過原來任性如我亦有例外! 呢間位於大坑浣紗街嘅雪糕店營業大概半年,已經成為年輕人食雪糕嘅潮流指標,皆因佢利用創意將一成不變嘅雪糕變成藝術,而更重要嘅係,佢嘅雪糕杯同包裝紙都可以食! 「係架!係可以食架!」Oppa店長笑容滿面地解釋。 Moon $50 ($45不含可食用紙飾配料) 我有少少懷疑囉!不過見佢誠懇嘅態度同親切嘅笑容,就姑且信佢一次!望住個Menu,覺得個Tiffany 藍嘅雪糕最吸引(其實真名係MOON,好詩情畫意),於是就即刻Order!Oppa隨即就背住我喺個Counter後面忙忙忙,搞到我好鬼好奇,究竟佢搞緊乜?原來Oppa擠完雪糕之後,會喺雪糕上淋上微暖嘅朱古力醬,朱古力醬遇冷就會形成一層脆皮,再「審」啲朱古力脆脆、爆炸糖同金星朱古力,最後插上一啲有關星空主題嘅食用米紙同喺曲奇杯上包上一層食用米紙包裝紙就大功告成!呢個架步絕對可以呃到好多Like! 雪糕上都有紙飾,由於主題係Moon,所以紙飾以太空船、星空為主,好靚呀!小妹我唔捨得食!!!! 「個曲奇杯同米紙裝飾全部都係自家整嘅,因為覺得食完雪糕包裝紙就揼好晒,所以就諗到用可食用米紙整成包裝紙,食埋就唔會晒啦!」Oppa店長果然好環保!不過究竟呢個藍月雪糕係咩味呢?波子汽水?雲呢拿?小妹我食極都食唔出,似鹹非鹹,似甜非甜,味道獨特。 「係芝士餅味!」Oppa一語道出,係呀!係芝士餅!啲朱古力脆脆同爆炸糖有少少混淆味覺,令我食唔出雪糕嘅真正味道,不過知道咗之後單獨食一啖雪糕,你又會會心微笑自己被欺騙嘅味蕾,然後繼續享受鹹甜間嘅樂趣!小妹好快就食晒杯雪糕,最後當然連曲奇杯同包裝紙都唔放過,如果呢一刻Oppa突然話我知啲包裝紙唔食得,我諗我都唔理得咁多,因為真係好Funny! 第一次覺得,雪糕都可以係主角! 宣傳板上嘅雪糕名叫XOXO,都係大熱之作!!! Oppa成日背住我做嘢,搞到我好好奇! Oppa努力製作雪糕中... ... 店名:Looop 電話:8192 8815 地址:大坑浣紗街 2A 地下 營業時間:星期一至日: 12:00-00:00