香港近年興起懷舊,偽文青沉迷玩菲林相機同潮影黑白照、年輕男女復活格仔衫潮流、玩具發燒友到處搜尋扭計骰、鐵製小露寶公仔... ...懷舊,永遠唔落伍。 將收銀變成錢莊 位於元朗大棠路嘅老馮茶居就食正呢條水,以七、八十年代為題材,以巧手精製港式點心做賣點,誓要將港式情懷發揚光大。現年30歲嘅店舖老闆馮文傑,年紀輕輕已對懷舊事物情有獨鍾,早喺5、6年前已經打算開一間以懷舊為主題嘅茶居,再加上父親馮耀榮曾經係酒家嘅中式點心師傅,入廚40年,做得一手精緻港式點心,這為自小吃父親點心長大的馮文傑打了一枝強心針,決定父子檔開舖,父親整點心,兒子打理樓面,雙劍合壁! 雞公碗、雞公碟、雞公杯、雞公匙羹、雞公茶壺,好想屋企都儲埋一套!!!! 雖然茶居同一般嘅茶樓同點心店所售賣嘅點心無異,普洱、香片、鐵觀音,一盅兩件,簡直係茶客每日嘅一大樂事。但雞公餐具、舊式收音機、碌架床、糧油雜貨店、圓枱摺櫈、冰室、公屋... ...呢啲你又喺茶樓見過未?店主將舊時嘅香港風貌濃縮喺一室茶居,讓年老一輩回味過去,年輕一代了解歷史,彷如步入香港歷史博物館! 冰室區 大排檔區 士多水吧 糧油雜貨店 碌架床 公屋 甫踏進店,不難發現老闆將店完美區分,左邊嘅冰室,以卡位雅座為主,牆上係仿復古嘅懷舊海報,嗌一杯Cola,與小情人相望對飲;右邊係大排檔,兩排圓枱摺櫈,牆身打造成糧油雜貨店,柴米油鹽醬醋茶排成一面牆,米要幾多斤?豉油打幾多壺?舊時嘅家庭主婦定必唔會陌生。抬頭向上望,公屋走廊、鐵閘、電梯門、鐵窗花、三支香晾衫架、碌架床,再加上地面嘅紙皮石地板,活脫脫就係七、八十年代嘅公屋,香港人嘅集體回憶! 一盅兩件亦不容忽視,老馮鮮蝦餃係店舖主打,圓鼓鼓嘅蝦餃,每塊餃皮都有9摺,以澄麵同生粉搓成,透薄柔韌,再以本地鮮蝦及少量豬肉作餡,彈牙多汁! 店舖打正懷舊旗號,又點可以冇咗懷舊點心呢?呢樣鵪鶉蛋燒賣喺呢個時勢已經買少見少,唔少酒樓亦懶做呢樣高膽固醇食物。師傅將大地魚烘乾後再磨成粉,混入豬肉同鮮蝦,再加一粒鵪鶉蛋,真係鮮味無窮!小妹勝在年輕冇有怕,照樣粒粒啪!膽固醇?咩嚟架? 老馮蝦腸係另一亮點,老闆堅持以人手製作,將磨好嘅米漿鋪喺蒸具上,再放入鮮蝦蒸熱,一碟滑不溜口嘅蝦腸就大功告成! 豉汁蒸鳳爪係小妹飲茶必嗌,要做得又淋又入味真係好難,店舖先將雞腳炸至金黃,再放入葱、薑、八角、豆豉及秘製調味料炆至醬汁杰身,但個人覺得偏鹹,略感遜色。 古法千層糕依足傳統方法炮製,咬一口,滿口鹹蛋黃及椰絲嘅香,加入糖冬瓜,又爽又甜,又係另一膽固醇大挑戰! 點擊圖片放大 +2 其他仲有老馮鹹水角、馬拉糕、缽仔飯及桂花糕等,嗌滿一枱都唔過$300,夠晒一家人或三五知己食飽飽!溫馨提示,午市所有飲品都半價架!!! 店名:老馮茶居 電話:2659 8826 地址:元朗大棠路66號地舖 開放時間:星期一至日: 09:00-00:00