手羽先(Tebasaki),即係雞翼,係名古屋名物,好多嗜蒲居酒屋嘅日本上班族都喜愛呢種佐酒小食。而位於尖沙咀金馬倫道嘅「世界の山ちゃん」就係嚟自名古屋,喺日本開業33年嘅山哥,於國內已有逾70間分店,靠雞翼打出名堂,而金馬倫道呢間分店就係佢首間喺海外嘅分店。 店舖主打居酒屋風格,主要以佐酒食物為主,但亦有饅魚飯、鍋物及拉麵等。雖然只開晚市,但每晚亦有慕「夢幻手羽先」之名而來嘅食客前來排隊,而小妹當然唔會錯過呢個機會,試吓係咪真係要吮手指咁誇張!! 王牌夢幻雞翼喺日本每間分店都日賣超過100份,照呢條數計(希望唔會好似「神算軒」咁計錯數啦),70間分店每日咪賣成7,000份?而每份雞翼有5隻,咁每日咪KO 35,000隻?咁一個月30日計,每個月咪差唔多賣出成100萬隻雞翼?好恐怖呀!! 雞翼以獨特香料醃製後,外皮炸得香脆可口,食落有陣陣胡椒香同七味粉嘅香辣,雖然味道上有啲偏鹹,但如果佐酒真係一流,又酥脆又充滿辣勁,再加上冰凍嘅啤酒,真係夫復何求!!店舖特設「雞翼教學」,教客人點樣可以有技巧地、完完整整咁食晒成隻雞翼,真係貼心到爆!不過計我話,大家應該按自己嘅食法食,Free啲Casual啲,想點食就點食,呢啲教學只係一種吸引人嘅宣傳方法嚟,等你以為食雞翼都Pro過人,日本人喺呢方面真係好有腦!!不過,如果你自問真係唔識食雞翼,仲要係冇見過雞翼(你都咪話「唔會呀嘛?搞事咩?」因為真係有啲90後連雞都冇見過,一直都以為雞就係佢開餐時塊雞排),咁我建議你跟住山哥個方法食,皆因人哋個教學係特別為你而設,學得唔好嘥!! 店舖內不乏日本人幫襯,見每枱日本人都會嗌一串串啡啡哋嘅東東,揭吓餐牌,原來係赤味噌豬肉串!豬肉串表面鋪上滿滿嘅赤味噌醬,又鹹又香,又係另一樣佐酒一流嘅小食! 食咗咁多肉,點都要食吓啲菜Balance吓,特別Order一份麻醬凍豆腐沙律清清味蕾,凍豆腐淋上胡麻醬,食落透心涼之餘又充滿芝麻香味,再伴以青瓜、生菜同蕃茄,真係幾Fresh架! 不過計我話最好食就係佢嘅鰻魚飯,雖然唔係日本高級餐廳嘅貴價鰻魚飯,但係都係用心之作!! 鰻魚飯以一個木製器皿盛裝,打開蓋便傳出陣陣甘香嘅燒汁味,單係聞就已經食指大動!入口即融嘅鰻魚肉甘香可口,再配合嚟自日本、充滿蒲燒醬汁嘅珍珠米飯,真係一啖接一啖,完全冇停口!不過飯量同鰻魚量唔多,要慳啲食,皆因店舖特別為你準備配菜同鰻魚高湯,畀你體驗吓鰻魚飯三食嘅不同快感! 第一係原味咁食,所謂原味,就係將烤鰻魚同飯裝入小碗中慢慢品嚐,感受鰻魚喺口度化開嘅感覺。 第二係將海苔、青葱、芝麻與鰻魚飯混合攪拌,食落會比原味多咗一層辛香。 第三係將之變成茶泡飯,將鰻魚飯加入特別準備嘅茶壺鰻魚高湯,然後再加入山葵拌開,又係另一個層次,鰻魚高湯又清又鮮,加埋山葵嘅刺激辛辣,最適宜冇乜胃口嘅夏天食! 講到呢度,應該到飲品出場了啩?話明居酒屋Style,又點可以少得酒呢?同朋友一人叫一杯酒類飲品,左邊嘅係水蜜桃燒酌,果汁味重易入口,適合想淺嚐酒嘅人。而右邊係威士忌梳打,以日本威士忌加梳打水,對於嚐酒嘅我嚟講絕對係Encore之選,雖然酒味稍重但爽口冰涼,再配埋香辣嘅夢幻雞翼,都咪話唔爽!! 店名:尖沙咀世界の山ちゃん Sekai no Yamachan Japan Restaurant 地址:尖沙咀金馬倫道57-59號金馬倫中心地庫 電話:2723 9038 開放時間:星期一至六: 17:00-23:30、星期日: 17:00-23:00