近日日本暢銷超人氣電影《進擊的巨人》在香港上映,掀起一股「巨人潮」,為了支持這股熱潮,位於旺角雅蘭中心的Yamaton大和豚総本店由即日起至9月打造了全港首間《進撃的巨人》期間概念店,今次小妹有幸獲邀參加博客交流大會,見識一吓「巨人」嘅威力,雖然對電影並不太著迷,但對於以電影概念推出食物卻躍躍欲試,睇吓會唔會有被巨人來襲時嘅刺激快感! 店舖由內而外都充滿以電影為主題嘅裝飾設計,恍如置身在電影劇情中!門口嘅巨人紙版可供客人集郵,玩味十足!簡直係未入店先興奮! 店舖門口有大張海報呀!!!!快啲影相啦!! 店內陳列咗一啲Figure,細問之下,原來店長亦係「巨人粉」,故店內會陳列佢嘅私人珍藏,咁有心,各位「巨人粉」又點可以唔嚟朝拜吓,影吓相呢? 講到呢度都未到戲肉架!店舖喺呢段期間會推出一系列進擊の料理,畀戲迷食個痛快! 首先係「巨人の韓美人鐵板鍋」, 選用來自荷蘭的頂級豚肉堆砌而成,底層係薯仔辣椒湯底同骨膠原,仲有豆腐、豬腸、五花肉、金菇、芽菜、紅蘿蔔絲、椰菜等堆成小山,豐富程度真係令人大開眼界!! 五花肉鮮甜多汁,蔬菜爽口可去除油膩感,再加上微辣嘅湯底,簡直係又刺激又爽!!食完出一身汗,仲唔係打完巨人咁? 巨人の韓美人鐵板鍋 而進撃の芝士烤骨,邪惡的芝士烤骨選用天然荷蘭豬肋骨,經過秘製醬汁調味,配以「芝」味濃郁的忌廉汁及Mozzarella芝士,食落甜甜哋又辣辣哋,十分惹味!配合埋香濃芝士一齊食,真係啖啖「芝」味,雖然係有啲邪惡,但係小妹真係食完一舊又舊,完全冇停口,真係唔係講笑!當你以為食完烤骨就冇下文?No No!店舖特設DIY泡菜炒飯,你可以自己炒DIY又得,叫店員幫你炒又得,又或者店員教完你炒、你再自己炒又得,得咗!總之嚟食呢個芝士烤骨就So Much Fun!有得玩又有得食,咁「打耳」,一定要Try Try! 進撃の芝士烤骨 店員後來示範炒飯步驟,大家可以學吓嘢先架! 1.將Mozzarella芝士及栗米加入鐵板中,等啲芝士溶化。 2.芝士溶化之後加入飯炒,令每粒飯都黏到芝士。 3.將有機雞蛋打入飯中間再快炒,等每一粒芝士飯上都黏到蛋漿。 4.根據個人喜好加入適量泡菜及辣醬,其實個辣醬唔係好辣,仲有啲甜甜哋,所以大家可以放心加多啲,會惹味少少!完成後可以加啲紫菜絲,咁就完成咗泡菜炒飯喇! 進撃の鐵人燒肉,選用荷蘭豚肉不同部位配搭,如豬柳、豬肩胛肉、豬小排及豬頸肉,配以日式燒肉的香烤特色醬汁,食起上嚟Juicy又惹味,真係要一試!客人亦可以隨喜好用生菜包住食,韓式食法冇咁油膩又健康,啱晒注重均衡飲食嘅朋友! 進撃の鐵人燒肉 巨人の富士山芋溶鍋,呢個鍋小妹一定激推,因為入面有女士恩物——骨膠原!面頭係極具營養價值嘅日本山芋,入口滑溜唔起渣,下層係荷蘭豚肉及各種雜菜,湯底經慢火熬製,食之前店員會幫你加大大碗骨膠原入去,真係見到都尖叫,各位絲打又點可唔試呀?? 巨人の富士山芋溶鍋 姊妹們,好多骨膠原呀!!!!! 憲兵團辛辣部隊鍋,齋睇個樣就知豐富啦!好多朋友一定試過尖沙咀部分韓式小店嘅部隊鍋,你會發現二百幾蚊一個鍋可以食嘅寥寥無幾,但呢個鍋就唔同,有Mozzarella芝士、午餐肉、茄汁豆、頂級豚肉、紅蘿蔔、芽菜、椰菜、栗米、年糕、泡菜、大葱等堆成一個小山,兩個人食真係咩都夠,而價錢仲要同出面嘅韓式小舖差唔多,精明嘅你應該識揀啦! 憲兵團辛辣部隊鍋,鍾意嘅可以喺最後加個辛辣麵架!! 店舖仲有特別推介嘅推進器飲品,有青蘋果、巨峰提子或藍蝶花荔枝飲品以供選擇,解渴之餘玩味十足! 推進器飲品,巨峰提子(左起)、青蘋果及藍蝶花荔枝。 仲有巨人血紅大啤,嗜酒如我當然要Order一杯湊吓熱鬧, 利用最新推出嘅紅桑莓味Hoegaarden加上Cream,血紅色真係入晒題! 巨人血紅大啤 至於特設嘅甜品瑪利亞圍牆蜜嘜多士,十足抵禦巨人嘅圍牆,大大件,食落外層鬆脆,內裡柔軟,分朱古力同雜果兩種口味,最特別係雜果個糖漿係玫瑰糖漿,食落啖啖玫瑰香,女士至愛! 瑪利亞圍牆蜜嘜多士(朱古力味) 瑪利亞圍牆蜜嘜多士(雜果) 如果你都鍾意《進擊的巨人》,又想同店長交流吓撃敗「巨人」心得,不彷試吓呢個以「巨人」為主題嘅餐廳,就算你係女仔,又或唔鍾意「巨人」嘅人都值得嚟試,因為店舖提供多款骨膠原食品,對於貪靚嘅女仔嚟講真係萬勿錯過架! 店名:Yamaton大和豚総本店 地址:旺角彌敦道625及639號雅蘭中心1樓101-102號舖 電話:2391 2112 開放時間:星期一至日: 12:00-23:00