途經荃灣大壩街,見到一間舖頭門口排咗勁多人,好好奇究竟係咩舖頭咁受歡迎,眼見門口係懷舊嘅中式裝潢,以為係主打傳統港式點心嘅小茶樓,但一睇餐牌,竟然係一間馬來西亞餐廳,小妹同朋友即刻攞籌排埋一份。 等咗大半個鐘,終於等到位,雖然間舖好細,但坐滿晒都真係可以坐到幾多人吓,但係相對就有啲迫,由於坐得唔係太舒服,所以大家食完都好快走,門外顧客等位嘅時間就比一般餐廳短。 小妹嗌咗最愛嘅肉骨茶,分別係豬腩肉($40)同一字骨($76),只要一落肉骨茶嘅單,侍應就會每人放低一個碗仔,斟肉骨茶嘅湯,而且係可以無限斟!!!只要飲得晒就得!個人認為一字骨非常好食,肉質一啲都唔「鞋」,而且唔會起渣,非常似台灣嘅十全排骨。當然湯都係非常足料,湯色係深啡色,藥材味勁重,而且仲滲咗去肉入面,熱辣辣咁飲,冬天非常補身暖胃,真係值得一試! 點擊圖片放大 +2 椰香咖央多士($22)簡直係最驚喜嘅部分,即叫即整嘅烘多士香脆可口,再加上香甜不膩嘅咖央醬,每人一件真係唔夠,要嗌多兩三份先夠過癮,最重要嘅係$22一份一啲都貴。但要注意嘅係,一上枱就要即刻食,如果唔係腍咗會影響口感。 馬拉沙嗲串燒(6串$85/3串$45)非常惹味,沙嗲醬「傑」身,沙嗲微辣,花生醬香濃而唔搶。 如果你好辣,不妨一試佢嘅辣嘢,小妹試咗檳城亞參叻沙米線($48),味道偏向少少刺激,但有青瓜絲同生菜絲等做緩衝,口感帶清爽,令辣味平衡。湯底香濃,同樣係落咗唔少材料同心機。 飲品方面,馬來西亞拉茶($25)同冬瓜龍眼茶($29)值得一試,前者甜甜哋,奶味重,後者清甜消暑。 點擊圖片放大 +5 店名:蘇媽.蘇媽馬來西亞茶餐室 電話:35911208 地址:荃灣大壩街71號地舖 營業時間:星期一至日11:30 - 22:30 Blog:http://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331