如果你同我一樣都係摩洛哥風情國兼泰菜粉絲,呢間位於旺角嘅網紅店Morokok一定好啱你!


擁有8000呎嘅餐廳,到處都充滿摩洛哥嘅異國風情,如具當地文化且色彩豐富嘅金屬器具、皮革製品、木雕、印花瓷磚等,令人猶如置身摩洛哥。但令人吃驚嘅係,餐廳居然係主打泰國菜,呢種風馬牛不相嘅Crossover,小妹真係第一次見。


前菜「泰式小食拼盤」($128)最啱一班朋友Share,春卷、雞翼、炸蝦餅、胡椒肉條等都可以一次過試勻,大飽口福!


主菜「蛋包金邊粉伴大虎蝦」($148),金邊粉唔會炒得過腍,食落有彈性,伴埋蛋網一齊食,充滿蛋香。大蝦雖然係雪藏蝦之輩,但蝦肉唔會霉,烤焗之後依然保持爽口彈牙,質素唔錯。
甜品係「芒果糯米飯」($78),芒果香甜,厚肉多汁,糯米飯用咗斑蘭葉汁同蝶豆花汁調色,色彩鮮艷,食落椰香味重得嚟唔會過份甜膩,集色、香、味俱全。


如此高質嘅泰菜,原來係有米芝蓮泰廚同曾喺深灣遊艇會任職嘅西廚助陣,難怪味道同質素都同一般泰菜館唔同。
另外又嗌咗兩杯紅(Tempranillo)、白(Chardonnay)餐酒佐餐,配合寬敞又具情調嘅異國風情環境,非常完美!加上店內多打卡位,好似門口嘅五重拱門、火烈烏牆紙、印花瓷磚牆、霓虹燈座位、座地大露台等,真係影到唔捨得走!

店名:Morokok
電話:23631882
地址:旺角登打士街56號家樂坊8樓801號舖
營業時間:星期一至日11:30 – 01:00

This entry was posted in 主題餐廳, 家庭聚會, 情侶約會, 泰越菜, 特色餐廳, 知己聚會 and tagged , , , , , , , , , , , , , , , , , . Bookmark the permalink.