相信日本東京係唔少人放假必去嘅旅遊地點,但係好多時都為咗唔知買咩手信而煩惱,依家小妹就分享吓自己去東京買嘅手信,睇吓可唔可以畀啲Idea大家!
1)雜錦固力果百力枝
固力果嘅口味多不勝數,而且每個國家同地區都有自己獨特嘅口味,而東京嘅「激安」就有呢款集齊九集味嘅雜錦百力枝,貪心想試勻晒所有味嘅朋友一定唔可以錯過!最特別嘅係信州蘋果味、瀨戶內檸檬味、章魚燒味同東北胡椒烤牛味,另有大阪燒味、抹茶味、Wasabi味、明太子味同芝士味。(購於機場激安之殿堂)


2)Royce朱古力
小妹鍾情呢款士多啤梨果肉朱古力棒,食落充滿朱古力同士多啤梨嘅香甜味,仲有士多啤梨果乾嘅酸酸甜甜味,唔會太甜膩。(購於羽田機場)
3)香蕉蛋糕
相信大部份香港人去到東京,都一定會買呢款香蕉蛋糕,不過小妹覺得過於甜膩,尤其係拖肥焦糖味,所以都只會買原味,但都已經覺得好甜!買少少哋一盒都夠喇!(購於東京站手信街)


4)士多啤梨蛋糕
除咗香蕉蛋糕,呢款士多啤梨蛋糕算係蛋糕類而唔會過甜嘅選擇,香軟蛋糕夾住士多啤梨醬夾心,女仔最愛!(購於東京站手信街)


5)朱古力夾心脆餅
Tiffany藍色包裝係一大賣點,香濃朱古力味配合三層薄脆口感,試過唔會捨得送畀人。(購於東京站手信街)
6)甜薯撻
牛油撻皮上嵌滿甜薯蓉,叮熱食最正。(購於東京站手信街)


7)芝士蛋糕
呢款芝士蛋糕唔係一般貨色,而係真係見到中間夾住芝士條,以芝士味蛋糕夾住香濃芝士,雙重「芝」味!(購於東京站手信街)


8)龍蝦米餅
呢款米餅充滿龍蝦鮮味,帶微辣,每塊餅上都有粒粒脆米,增加口感。(購於Akomeya Tokyo)


9)花生脆撻
鍾意香口嘢嘅朋友千祈唔可以錯過呢款脆撻,撻底香脆,仲有滿滿嘅花生碎,面層有薄薄麥芽,唔會過甜。(購於Akomeya Tokyo)
10)沖繩紫薯撻
雖然係沖繩特產,但係見到都一定要買,原因係真係好好食!牛油撻皮上嵌滿紫薯蓉,香甜軟糯。(購於激安之殿堂)


11)即食芝士條
芝士切割成條狀,方便食用,而且味道非常香濃,可配紅酒,但就咁當零食食都已足夠。(購於阿美橫町二木之菓子)
12)特濃抹茶固力果百力支&辻利抹茶粉
兩款都係特濃抹茶味嘅產品,前者百力支上有超濃抹茶醬,後者係即沖嘅抹茶奶。
13)蕃薯白豆羊羹&栗子紅豆羊羹
羊羹係日本名物,呢款羊羹用咗日本產嘅蕃薯、白豆、栗子同紅豆製作,仲真係食到糖漬蕃薯同栗子,真材實料。(購於Akomeya Tokyo)
14)抹茶大福
呢款大福係每個人去東京「激安」必買嘅手信,皆因份量多,係唔少人嘅公司手信。雖然抹茶味唔濃,但食落都唔差嘅。(購於激安之殿堂)
15)清酒Kitkat
Kitkat同樣係口味多多,呢款清酒味味道非常獨特,值得一試!(購於激安之殿堂)


16)士多啤梨味Kitkat
冬日限定嘅士多啤梨味一定要試啊!(購於激安之殿堂)


17)櫻貝
乾曬櫻貝充滿鮮味,帶微辣,送酒一流。(購於Akomeya Tokyo)


18)飛驒和牛咖喱
小妹好少見以飛驒和牛做咖喱,所以見到即刻買嚟試。牛肉「鞋」口已預咗,但咖喱都幾好食,佢唔係太辣,但勝在夠香夠濃!(購於Akomeya Tokyo)


19)明太子意粉醬&龍蝦味即沖味噌湯
對於我呢啲懶人嚟講,即沖食品就最啱!尤其係日本嘅明太子意粉醬同即沖味噌湯係幾唔錯,前者充滿粒粒明太子,香辣入味;後者有香濃龍蝦味,係高級版味噌湯。(購於阿美橫町二木之菓子)

This entry was posted in 日式菜 and tagged , , , , , , , , , , , , , , , , , , , , , , , , , , , . Bookmark the permalink.