生活好苦,社會好苦… …長期處於呢種情緒同環境,真係好易變抑鬱,早前小妹暫時放下苦悶心情,食番啲甜嘢調節,苦中一點甜!
呢間位於元朗嘅甜品店(聽到呢個地方,大家可能已經唔想去,不過唔緊要,你當一篇美食分享睇就OK),主打芋圓甜品,以大堆頭做賣點,用料非常足。


「我最喜愛芋圓」($43)用咗三色芋圓(地瓜、紫薯、芋頭)、珍珠、紫薯蓉、仙草、小丸子、紅豆沙、花奶等材料,芋圓咬落微甜帶煙韌,地瓜、紫薯味芋圓薯味超濃,反而芋頭味味道唔突出,都正常嘅,芋頭陣味本身就唔突出,如果太濃芋頭味,反而顯假。最驚人係嚿紫薯好大嚿,綿密口感食到紫薯纖維。由於甜品用料豐富,所以一碗糖水已經食到唔同口感。


「D24榴槤皇豆腐花凍芋圓」($44)只用咗兩色芋圓(地瓜、芋頭)、豆腐花同D24榴槤蓉,榴槤蓉唔係榴槤嘅副製成品,而係實實在在嘅一嚿榴槤球,如此真材實料,作為榴槤迷不妨一試。
小妹睇晒佢餐牌,單嗌呢兩樣甜品就可以試勻晒佢啲材料,大家都不妨咁樣嗌。不過食完甜品,香港人又要再加油了!

店名:摩登士丹里
地址:元朗青山公路元朗段22-26號金源大廈地下1號舖
電話:N/A
營業時間:星期一至四12:30 – 23:00,星期五至六12:30 – 23:30,星期日12:30 – 23:00

This entry was posted in 新界, 甜品/飲品, 甜品糖水 and tagged , , , , , , , , , , . Bookmark the permalink.