週末又就到,你係咪煩惱緊同閨密去邊度食飯呢?小妹推介幾間食過又唔錯嘅西式餐廳畀大家,大家快啲Bookmark,同閨密度過一個充滿美食嘅週末啦! 1)白酒與青口嘅完美配搭@FRITES Belgium on Tap 放工嘅時候最正係同好姊妹飲番兩杯,而白酒係最優雅嘅選擇,但係飲白酒點可以冇海鮮?呢間位於銅鑼灣、主打比利時菜嘅「FRITES」,就係熱愛白酒與海鮮嘅人嘅最佳選擇。 小妹最愛佢嘅「Frites House Musseles@Mussel Pots」,半KG都係$245,已經夠兩個人食,如果人多仲有1KG份量。採用比利時細Size藍青口,每粒都新鮮甜嫩,配合蕃茄、韭菜、洋蔥、蒜粒同輕奶油烹調,鮮嫩味道更突出,若配一杯白酒,感覺真係好似去咗比利時食青口一樣! 另外「Crab Tian」($135)亦係店內人氣菜式,鮮拆蟹肉配合芹根蛋黃醬、蠶豆碎、牛油果、蕃茄、豌豆牙同檸檬醬,入口充滿蟹肉鮮甜之餘,亦有蔬菜清新味道。惟一缺點是偶爾食到蟹殼。 而「Rosemary Roast Chicken」($255)則選用法國春雞,以檸檬香草薯仔、糖漬蕃茄、奶油玉米同芥末醬烹調,雞肉肉汁保存完整,外皮香脆,肉質嫩滑,汁醬惹味,值得一試。點擊圖片放大 店名:FRITES Belgium on Tap 電話:21425233/98282961 地址:銅鑼灣希雲街38號曦巒地下1號舖(有其他分店) 營業時間:星期一至日11:00 - 22:30 ______________ 2)玩味西班牙菜@La Postre 如果你睇過小妹嘅《港女的甜味時光》,一定知道小妹曾經介紹過呢間餐廳嘅甜品,雖然甜品唔係話特別出色,但勝在夠創意。點擊圖片放大 而位於元朗新開嘅分店一樣創意無限,黑膠碟杯墊、避孕套包裝式濕紙巾同迷你版Tic Tac糖,玩味十足!點擊圖片放大 菜式方面,小妹試咗西班牙多士拼盤($158)、漁夫海蜆($98)、松葉蟹奶油芝士意粉($208),味道不過不失。 較驚喜嘅居然係甜品——無花果脆批($79),香甜無花果配即整香脆餅批,加上冰凍雲呢拿雪糕,冷熱交加,非常過癮。 店名:La Postre 電話:28681126 地址:元朗元龍街9號形點一期地下G010號舖(有其他分店) 營業時間:星期一至日11:00-22:00 ______________ 3)早餐晚食,有「營」之選@Green Waffle Diner 主打窩夫同全日早餐嘅「Green Waffle Diner」,喺香港一早打響名堂,但原來佢嘅西餐都值得一試!燒烤豬肋骨伴蕃薯條及沙律(Half $138,Full $188),先以低溫慢煮豬肋骨,再淋上燒烤汁烤焗,食落肉質軟腍又惹味,配番杯紅酒最啱! 牛肉粒薯粒鑊仔(BB Size$98)芝士味非常重,配合牛肉粒、炸薯粒、蘑菇、洋蔥同水煮蛋,雖然係烤焗之物,但食落極有鑊氣! 牛油果炒蛋三文治($89),雖然晚餐食呢個有啲奇怪,但絕對適合健康飲食嘅好姊妹。半份牛油果、兩隻炒蛋、裸麥包、沙律菜、車厘茄,色彩繽紛又有「營」。 新鮮百香果梳打($46),真係半隻新鮮百香果擺出嚟,飲落清新爽口。點擊圖片放大 +2 店名:Green Waffle Diner 電話:23630938 地址:元朗元龍街9號形點一期地下G002號舖(有其他分店) 營業時間:星期一至日10:00 - 22:30 ______________ 4)蔬菜與海鮮的配搭@The Point 海鮮同蔬菜從來就係兩個世界嘅嘢,但原來擺埋一齊烹調竟可相輔相乘,皆因海鮮可令蔬菜更具鮮味,蔬菜又可以令海鮮食落更清新。 軟殼蟹配烤紅椒汁扁意粉,鮮炸軟殼蟹香脆,扁意粉以經烤焗嘅紅椒汁烹調,食落唔會太「漏」。紅椒汁唔係辣嘅,但清新味道可中和軟殼蟹油炸嘅膩感。 香蒜橄欖油炒野菌配溫泉蛋,份量唔多,但勝在野菌被炒得惹味香濃,食嘅時候需拌勻半熟水煮蛋,蛋漿包裹野菌,又係另一種層次。 甜蕃薯條配香辣沙律醬,近年漸漸戒炸薯仔條,感覺澱粉感太高,但蕃薯條感覺相對健康(個人心理),所以如果有得揀,都會揀蕃薯條。甜脆蕃薯點上經辣醬混和沙律醬嘅汁醬,甚具馬來南洋風味! 店名:The Point 電話:25980030 地址:尖沙咀彌敦道100號The ONE 4樓409號舖(有其他分店) 營業時間:星期一至日11:30 - 22:30 ______________ Blog:http://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331