呢期個個都上深圳玩,貪上面有好多網紅打卡店,但大家又知唔知香港都有好多好有特色嘅餐廳同Cafe呢?
(1)令人心心眼的粉紅Cafe@花說
位於長沙灣嘅「花說」,以全店嘅粉紅色裝潢吸引少女們嘅青睞,平日唔少少女專程嚟打卡呃Like,門口側邊嘅落地玻璃座位就係最多人打卡嘅地方,由窗外攝入,非常有文青味道。室內擺設都好有少女味,好似獨角獸、火烈鳥、乾花等,都係最佳嘅攝影輔助。


食物質素方面就不過不失,全日早餐($118)非常豐富,有黑松露炒蛋、煙肉、煙三文魚、薯餅、牛角包、蕃茄、焗豆、沙律菜等,一定唔會食唔飽。
黑松露雜菌意粉($98)菌味濃郁,白汁香滑。
小食拼盆($78)啱晒一班好姊妹分享,每人一件唔會太肥。


嘢飲方面,獨角獸($48)非常特別,海藍色梳打混合粉紅糖漿,係夢幻嘅顏色。由於有兩項主食係套餐,隨餐附送巨峰提子梳打同熱柚子蜜。


店名:花說
地址:長沙灣福榮街565號地舖
電話:28869110
營業時間:星期一12:00 – 22:30,星期二全日休息,星期三至日12:00 – 22:30,公眾假期12:00 – 22:30

—————————————————————-

(2)Cafe型小酒館@梔子
如果你鍾意小清新嘅Cafe,但又鍾意飲酒,咁「梔子」應該就係最好嘅選擇!聽聞係由兩位鍾意去旅行嘅女仔開嘅,而且兩位仲極熱愛飲酒,所以就開咗呢間日頭係Cafe、夜晚係小酒館嘅「Cafe型小酒館」,主打健康輕食、手工啤、Cocktail、清酒等。


由於小妹係Lunch去,所以未有感受酒館氣氛,但日頭去一樣好Chill好正。店內以小清新風格為主,最靚嘅打卡位係面向街嘅半開放式座位同店內嘅梔子花樹。
食物方面以簡約、原味為主,非常健康。Avobagel($78)值得推介,以牛油果、蛋、忌廉芝士放入鬆軟微暖嘅貝果包入面,芝士濃郁、蛋香、牛油果軟滑,居然有Comfort Food嘅效果。
原以為芝士蘑菇釀雞翼($68)呢啲手工菜唔會喺小店出現,但「桅子」卻整得外脆內軟,估唔到如此心機菜做得頗有家庭味道。
鮮帶子黑松露意大利麵($168)味道尚可,惟份量較少,性價比唔高。
另外又嗌咗由士多啤梨、番石榴同雪梨打成嘅Strawberry Dream($58)果汁,頗清潤解渴。
店名:梔子
地址:尖沙咀山林道8號地舖
電話:27781628
營業時間:星期一至四12:00 – 00:00,星期五至六12:00 – 01:00,星期日12:00 – 00:00

—————————————————————-

(3)走入童話世界@愛麗絲的秘密花園
如果你係愛麗絲夢遊仙境嘅Fans,呢間Cafe一定唔可以錯過,原因係店內滿是愛麗絲元素嘅裝修擺設!好似森林系草綠色打卡牆、宮廷式枱櫈、立體故事書等,就連食物都係以故事內嘅人、事、物命名,不過食物味道只屬一般,目的為打卡會好啲。


大烈鳥打槌球Flamingo’s Croquet($48)原來係秘製紅黑鴛鴦雞翼,兩隻韓式辣醬雞翼拼兩隻醬油雞翼,味道較一般。
特偉兄弟Tweedledum n Tweedledee($78)係牛肉芝士迷你漢堡配雞肉豆腐迷你漢堡,雞肉較有彈性,相反牛肉較乾。
輝煌日的空龍Tabberwocky on Frabjous Day($128),拿破崙香草鮮茄油虎蝦意粉嘅味道唔錯,但意粉Overcook,有啲太腍,虎蝦屬雪藏級數,係預期之內。


店名:愛麗絲的秘密花園
地址:油麻地彌敦道577號高氏大樓6樓B號舖
電話:65951177
營業時間:星期一至日13:00 – 23:00

—————————————————————-

(4)野餐式聚餐@草民
呢間Cafe最吸引人嘅地方就係店內嘅人造草被,感覺真係好似坐喺草地上野餐一樣!最啱熱愛野餐但又怕曬嘅朋友仔。


食物方面,味道竟然意料之外好食。烤雞芝士墨西哥夾餅($92)係小妹至愛,餅皮微脆,烤雞配合芝士香濃有彈性,仲有菠蘿帶微甜,超級好食!
63度溫泉蛋卡邦尼意粉($88)忌廉白汁香濃,混合半熟溫泉蛋漿嚟食一流。
其他主食仲有鮮茄蓉肉丸意大利麵($88)、炸魚薯條配他他醬($102)同西班牙辣肉腸千層麵($118)。


店名:草民
地址:尖沙咀厚福街12-12A號藍馬商業大廈9樓
電話:66932896
營業時間:星期一全日休息,星期二至日12:00 – 22:30

—————————————————————-

(5)森林系城市綠洲@慢理牆城
位於旺角砵蘭街M1酒店入面嘅「慢理牆城」,以健康嘅超級食物為主打,森林式裝潢、原木桌椅、綠化植物,令人猶如置身喺森林式園林之中,亦係打卡熱點。

最吸睛嘅係杯藍色嘅水,我估係加咗蝶豆花嘅水。


食物方面更加誇啦啦,小妹最愛慢落豬($268),採用西班牙黑毛豬肉,以慢煮方式烹調,保留豬肉嘅肉汁同彈性,再以燒烤形式呈現,配上三色椒,豬嘅味道更濃更鮮。而搭配嘅甜蕃薯角比起薯角更健康,食多啲都唔怕。
牆城小食拼盤($168)份量頗多,即使叫細份,三個女仔都食唔晒,非常抵食。拼盤內有美式香辣雞翼、德國腸、脆炸薯條、甜蕃薯角同芝士條,卡路里爆燈但味道滿分。


明太子蟹肉扁意粉($148)明太子醬微辣開胃,蟹肉鮮甜,係唔錯嘅主食。


店名:慢理牆城
地址:油麻地砵蘭街28號M1酒店1樓
電話:27106633/94396585
營業時間:星期一至日12:00 – 17:00,17:30 – 22:30;公眾假期12:00 – 17:00,17:30 – 22:30;公眾假期前夕12:00 – 17:00,17:30 – 22:30

—————————————————————-

(6)樹下嚐甜@Gram cafe & pancakes
日本梳乎厘Pancake過江龍「Gram」喺香港開分店,小妹當然要一試,但最吸引我眼球嘅唔係梳乎厘Pancake,而係店中一棵大樹,令小店瞬間一片綠意盎然。樹下嘅座位係打卡熱點,自然吸引唔少人爭住坐。


小妹是次冇嗌梳乎厘Pancake,反而試咗佢嘅烤蘋果配紅茶忌廉班戟($118)。班戟嘅蛋漿預先混合紅茶茶葉粉粒去煎烘,所以班戟中會有細碎嘅茶葉粒,食落亦充滿茶香。而忌廉亦用心地加入紅茶葉粉,令茶味更突出。蘋果經過烤焗,甜味更濃。再配以一壺蘋果紅茶,味道非常之夾。


店名:Gram cafe & pancakes
地址:尖沙咀彌敦道100號The ONE 4樓L408舖
電話:23684588
營業時間:星期一至日11:00 – 23:00

(7)文青龍蝦.蟹肉包@茶聊
大部份賣龍蝦包、蟹肉包嘅舖頭一係就係街邊流動檔,隨意企喺街邊食,一係就係稍有裝修服務嘅餐廳,極少打入文青市場,仲要同台式茶飲品Match埋一齊。


「茶聊」以飲茶同傾偈為主要概念,故命名為「茶」、「聊」,店內裝修頗迎合年輕人,好似花草牆配霓虹燈英文字,正正係年輕人打卡位。
烤原隻龍蝦.蟹肉.海膽醬包($188)係每枱必嗌,原隻波士頓龍蝦鉗經過烤焗後配上海膽醬食,味道唔錯,只可惜海膽醬嘅海膽味唔夠濃,作用唔大。龍蝦身嘅肉用嚟做包內嘅材料,同樣都用咗海膽醬調味,面層鋪上蟹肉,份量頗多。龍蝦肉彈牙,而蟹肉鮮甜,令包嘅層次提升,只係個人認為海膽醬可以唔落。


飲品方面,東方美人茶($28)香醇微甜,如走甜可以向店員要求。水果茶($43)則夾甜夾酸,可以一試。


店名:茶聊
地址:旺角砵蘭街189號1樓
電話:29891707
營業時間:星期一至日12:00 – 23:00

—————————————————————-

(8)嘢食最多嘅5千呎旗艦店@星巴克咖啡
一般去「星巴克」都係飲杯咖啡就算,好少會當佢係間餐廳咁食嘢,但位於銅鑼灣利園嘅呢間旗艦店就唔同講法,食早午晚三餐都得,而且質素唔差。


好似牛油果炒蛋天然酵母麵包($78),麵包香脆,牛油果炒蛋香滑,配上牛油果醬、時令蔬菜,簡直係一個Good Morning。


而士多啤梨鬆餅($88)可以媲美一般日式或台式鬆餅店,美式鬆餅軟腍有蛋香,配上士多啤梨及果醬、忌廉、雪糕、杏仁片、楓糖漿等,口感味道一流,係下午茶或飯後唔錯嘅選擇。
鮮果茶園($58)同台式水果無異,大大杯充滿新鮮生果,仲可以揀英式紅茶、洛神花茶、薄荷香檸綠茶或白茶等茶底,非常個人化。此外,店內仲售賣啤酒同雞尾酒,直頭半個小酒館一樣。


而店內嘅落地玻璃窗位係唔少網紅嘅打卡位,大家如果霸到窗邊座位不妨打卡。
店名:星巴克咖啡
地址:銅鑼灣新寧道1號利園三期1樓101至110號舖
電話:N/A
營業時間:N/A

—————————————————————-

(9)小清新隱世食店@Coffee Talks
位於旺角東站附近有間唔起眼嘅Cafe,但係食物味道一流,如果唔係小妹嘅一位朋友帶路,我行過路過一定錯過!Cafe同樣用心地打造咗落地玻璃窗邊位,供食客打卡。


小妹最推紅莓醬煙鴨胸意粉($98),甜甜酸酸嘅紅莓醬配合煙鴨胸,非常惹味開胃。


而牛油果蟹棒車厘茄比薩($128)亦非常好食,由於Pizza係薄脆批,所以唔會好似食咗一大嚿麵包咁滯,而牛油果、蟹棒同車厘茄都非常夾,成個批香、脆、甜、軟、腍於一身,值得一試。


店名:Coffee Talks
地址:旺角洗衣街167-175A號嘉德大廈地下2號舖
電話:37053128/69990623
營業時間:星期一至六11:00 – 22:00,星期日10:00 – 21:00,公眾假期10:00 – 21:00

This entry was posted in Café, 中國菜, 主題餐廳, 九龍, 南美菜, 家庭聚會, 情侶約會, 意大利菜, 新界, 日式菜, 時令, 東南亞菜, 法國菜, 泰越菜, 特色餐廳, 甜品/飲品, 生日派對, 知己聚會, 美國菜, 韓國菜, 食材, 香港 and tagged , , , , , , , , . Bookmark the permalink.