日本人放工後鍾意去居酒屋一醉解千愁,而小妹我放工後就鍾意去居酒屋開懷大食,同樣係居酒屋,但帶畀每個人嘅慰藉都唔同。 「味道樂」係小妹其中一間一試愛上嘅居酒屋,同一般居酒屋一樣,都係以日本地道居酒屋嘅裝橫為主,日本傳統啤酒海報、木製桌椅同門窗、和紙燈籠... ...最得意嘅係一牆矇面超人面具,可以知道店主孩童嘅一面。而我最愛印有河豚公仔嘅碗碟餐具,可愛又富日本特色。點擊圖片放大 +5 小妹最愛叫一客香炸日本池魚仔($48),原條小池魚鮮炸,雖然有啲殘忍,但食落外脆內軟,係送啤酒嘅良伴。再來一碟芝麻雞翼($58),雞翼係香港人最愛,去到邊都有佢蹤影,嚟日式餐廳自然亦係桌上美點。 條條有手指咁長 食完一輪餐前小食,自然係主角上場,大蔥雞肉串($48)係必嗌,雞肉表面燒至微焦,伴隨大蔥香氣,令我諗起日本新宿思出橫丁食過嘅一道大蔥雞肉串,同樣出色。 煙肉荔枝卷($48)以煙肉包裹荔枝肉放上爐上烤,煙肉鹹鮮香脆,荔枝甜潤,令人食完一串又一串。 黑椒黑豚肉($48)肉質鮮嫩多汁,微辛黑椒突出黑豚肉鮮,配清酒最佳。 雞骨腸($48)味道雖無特別,但勝在造型可愛。 如果食咗咁多嘢都唔飽,不妨嚟一個原條炭火燒鰻魚飯($128),拳頭咁大嘅飯團,手臂咁長嘅鰻魚,食完包保你捧住個肚離開。點擊圖片放大 +2 店名:味道樂居酒屋 電話:39563122/64855314 地址:尖沙咀河內道2號地舖 營業時間:星期一至日12:00 - 15:00,18:00 - 00:00