小妹係一名龍蝦迷,日前相約朋友到位於旺角嘅Day and Nite by Master Kama食龍蝦套餐。Master Kama喺香港有幾間分店,主打龍蝦餐,好似龍蝦包、龍蝦湯麵、烤龍蝦… …連龍蝦Pizza都有!

小妹同朋友一行兩人,食量都算細,所以叫咗一個龍蝦匯加兩杯嘢飲就夠。龍蝦匯($468,每日限量供應)包括一個龍蝦包(大概有半隻龍蝦肉嘅份量)、半隻烤焗龍蝦、一個石鍋龍蝦湯烏冬或湯飯,小妹揀咗湯烏冬。

龍蝦包非常足料,麵包經過烤焗,外層香脆,內裡軟熟,龍蝦肉經過蒜蓉同特製醬汁調味,突出龍蝦肉本身嘅鮮甜,成個包非常惹味。

薯條係蕃薯薯條,香甜又香脆。

烤焗龍蝦肉質Keep到爽口彈牙,可見烤焗時間拿捏得啱啱好,可惜龍蝦似冇咗應有嘅鮮甜,味道同質感不過不失,不過勝在蝦頭充滿蝦膏,鍾意呢啲重口味食物嘅朋友一定有驚喜。

龍蝦湯烏冬都頗有驚喜,龍蝦湯「傑」身,可以掛到喺烏冬上面,令每條烏冬都有香濃嘅龍蝦湯味。

嘢飲方面,小妹嗌咗一壺小國王蘋果茶($58),雖然係茶包茶,但杯同壺入面都配有新鮮青蘋果肉,令茶充滿蘋果香氣。

朋友嗌咗一杯蜜桃荔枝茶($48),大大杯,有輕微蜜桃同荔枝味,茶味亦唔算突出,但夏天幾解渴。

成餐飯加埋一食咗$631,對兩個女仔嚟講都飽,喺香港食龍蝦餐,呢個價錢都正常嘅。

店名:Day and Nite by Master Kama
電話:31060900
地址:旺角山東街50號1樓
營業時間:星期一至日12:00 – 22:00

This entry was posted in 日式菜, 法國菜, 特色餐廳 and tagged , , , , . Bookmark the permalink.