話說小妹覺得「野玩」呢條Line都幾有趣,多年前曾經試過「野玩山店」,感受過喺城市入面Camping嘅「滋味」,覺得餐廳頗有創意,可惜香港人貪新忘舊,新嘢過咗一排又不敵再新啲嘅嘢嘅衝擊,悄悄結業。後來有咗「野玩海店」,可惜小妹未試又已經結咗業,覺得上完山唔下吓海有啲遺憾。好彩仲有一間「野玩田店」,試吓鬧市中嘅鄉村味道。
其實小妹試呢間餐廳嘅時間已許久,只係一直未出稿,好彩大部分菜餚依然存在,希望快啲出文同大家分享。
話明係同田野有關,食材自然取自鄉郊,而最令小妹驚喜嘅係,差唔多所有食材都出自本地農場,力撐本地農夫同農業。好似「燒焗本地黑毛豬鞍架及菠蘿配燒汁」($348),選用本地農場黑毛豬,經過燒焗嘅豬鞍架肉汁被緊緊鎖住,食落輕帶豬嘅油花,質感豐腴,配上香濃燒汁同清甜菠蘿,口感豐富得嚟,一啲都唔會覺得膩。而伴碟嘅配菜係摘自店內種植嘅有機豆苗,上菜前一刻先收割上碟,令小妹嘖嘖驚奇!
「焗芝士日本溫泉蛋大啡菇」($110),大啡菇由本地有機農場直送,焗完之後Keep住Juicy質感,加埋日本溫泉蛋同芝士,香濃到令人慾罷不能!
「羽衣甘藍煙鴨胸沙律」($148) 嘅羽衣甘藍亦係每日由本地有機農場直送,非常新鮮,配合甘香美味嘅煙鴨胸,係個開胃嘅前菜,但呢個前菜嘅煙鴨胸依家好似已經換成三文魚,想試煙鴨胸可以嗌其他相關配搭。
飲品方面,小妹揀咗菠蘿黃金樹($78),將菠蘿同香草打成沙冰,非常冰涼清新。

店名:野玩田店 Something Wild – The Farm
電話:37554899
地址:尖沙咀河內道18號K11購物藝術館2樓201號舖
營業時間:星期一至日11:30 – 23:00
______________________________________
Blog:http://blog.ulifestyle.com.hk/blogger/shinysharon/
Facebook:https://www.facebook.com/hongkonggirl331

This entry was posted in 其他歐洲菜, 意大利菜, 特色餐廳, 美國菜, 食材 and tagged , , , . Bookmark the permalink.