講到韓國美食,大家一定會諗起炸雞、部隊鍋、芝士骨、紫菜包飯… …從來冇諗過素食同韓國美食都可以Crossover。日前小妹受餐廳「樸生」邀請,親試素食韓餐,令小妹好驚喜呀!
位於青衣城嘅「樸生」,主打韓風家庭料理,店舖分兩邊,一邊係素食,一邊係提供肉食,而小妹試嘅就係韓式素食。素食以半自助餐形式進行,客人只需要揀一款主菜,前菜、湯同甜品都可以自由喺食物吧攞。食物種類雖然比唔上酒店式自助餐,但絕對滿足到一眾想食韓食嘅素食者!


小妹同朋友揀咗素芝士炸素魚腐漢堡($168)同香煎素豬肉流心芝士漢堡排($188)作為主菜,前者十足十真Burger,尤其係芝士香軟,口感唔錯,唔講以為係真芝士!而炸素魚其係香酥豆腐,外脆內軟,配合新鮮蔬菜同烤焗脆身嘅包一齊食,唔會似食真漢堡咁漏。配餐嘅紫薯薯片係小妹大愛,香脆可口充滿紫薯香,可惜每餐一份,冇得Encore。


而後者相對較失色,雖然做到流心芝士感覺,但單食略嫌有啲小鹹,所以一定要用生菜包住食,先可以做到平衡。


至於食物吧嘅食物亦花咗唔少心思,好似自製部隊鍋,湯底有辣有唔辣,各款蔬菜同菇類、年糕,仲有素午餐肉(食落超級似真嘅午餐肉),自己DIY,想食咩就食咩。另外亦有自製韓式拌飯,同樣都係材料自己配搭,好玩又好食。


而小點同甜品都係精緻有心思,好似意式青醬香蕉、素蛋撻、手工麻糬、台式芋圓、手磨芝麻糊、豆腐花等,都值得一試!


時限90分鐘,小妹都試晒所有食物,原本以為冇乜特別,但試完竟然有驚喜,下次如果經過青衣城,都會再食呀!

店名:樸生・素食 Bobsang Green
電話:31050986
地址:青衣青敬路33號青衣城一期1樓119B號舖
營業時間:星期一至五12:00 – 22:30,星期六至日11:30 – 22:30,公眾假期11:30 – 22:30

Blog:http://blog.ulifestyle.com.hk/blogger/shinysharon/
Facebook:https://www.facebook.com/hongkonggirl331

This entry was posted in 韓國菜 and tagged , , , , . Bookmark the permalink.