每每聽到「紫薯」同「抹茶」呢兩種日本食材,香港人總係難以抵抗佢哋嘅魅力,其一可能係對於日本嘅情意結,其二就係呢一紫一綠、變化萬千所帶嚟嘅味蕾衝擊,而最大嘅吸引力莫過於甜品。 (1)「薯」不簡單@海記合桃坊甜品 原本以中式甜品為主打,卻加入紫薯元素,成為紫薯甜品專門店,以日式紫薯同中式糖水如紅豆沙、西米露、紫米露、豆腐花、涼粉、蕃薯糖水、喳咋等結合,非常創新!紫薯主要以雪樂冰(沙冰)、紫薯蓉、小丸子、紫薯圓等方式呈現,頗見用心。 紫薯雪樂冰芋圓豆腐花($30) 小妹試咗紫薯雪樂冰芋圓豆腐花($30)同紫薯芋圓紅豆沙($30),前者將紫薯製成沙冰,微帶紫薯纖維,食落香甜又透心涼,配合嫩滑豆腐花同軟韌Q彈嘅芋圓一齊食,口感豐富。 紫薯芋圓紅豆沙($30) 後者嘅紫薯係粒上,啖啖紫薯粒,薯香更重,再配埋芋圓同煲至起沙嘅紅豆沙,熱食更養生開胃。 店名:海記合桃坊甜品 電話:26608332 地點:尖沙咀樂道34號地下A舖 營業時間:星期一至日13:00 - 00:00 ________________________________________________ (2)「茶」靜一室@旮旯 原本開於深水埗舊區嘅小店,遷於元朗一隱世位置,行過雖易忽略,卻又不失寧靜,店中主打日式抹茶小點,小巧精緻,價錢亦合理。 抹茶葛餅($28/6件)Q彈可口,滿滿嘅抹茶餅沾滿葛團子,每啖都係抹茶嘅回甘味,如嫌微澀,可以點黑蜜或煉乳,更能食到茶香。 抹茶葛餅($28/6件) 麥糍($28/6件)嘅靈感相信係來自港式甜品麥提莎糯米糍,同樣糯米糍內包住麥提莎,只係外皮沾咗抹茶粉,多咗一層茶香。另外仲可以揀黃豆粉味,味道清新自然。 麥糍($28/6件) 抹茶卷蛋($30) 而抹茶卷蛋($30)則以抹茶海綿蛋糕包裹香甜紅豆,抹茶蛋糕嘅甘同金時豆嘅甜配合恰宜,食落唔會覺得過份甜膩。點擊圖片放大 +2 店名:旮旯 電話:23937611/96272088 地點:元朗裕榮徑11號好旺洋樓地下16號舖 營業時間:星期一全日休息,星期二至六12:30 - 14:30/15:15 - 21:30,星期日12:30 - 14:30/15:15 - 18:30 Blog:http://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331