作為美少女嘅Big Fans,當知道香港終於有佢嘅主題餐廳之後,小妹未話不說就打去訂位,可惜要喺Facebook私訊訂位,填完資料之後仲要等兩三日電郵確認,認真大陣仗!不過好嘢自然多人爭,小妹終於Book得一席位,可以瘋狂打卡!

餐廳四周圍都有美少女嘅芳蹤,例如月野兔同禮服蒙面俠嘅IG流動相框、五位美少女戰士嘅人形紙牌、人物色牆等等,令小妹瘋狂影咗好多相!


食物方面,每一樣點心都同美少女嘅人物有關,好似五色鮮蝦餃($89),雖然價錢稍貴,但係用料頗用心,以代表五位角色人物嘅顏色作為餃皮,粉紅色代表月野兔,係原味蝦餃;紅色代表火野麗,係麻辣口味;藍色代表水野阿美,係黑松露口味;綠色代表木野真琴,係菠菜蝦餃;而黃色代表愛野美奈子,係XO醬蝦餃。原本以為係清一色淨蝦餃嘅我,真係非常驚喜!不過餃皮較厚,蝦肉稍乾,但味道不俗。
菠菜麵雞扎($49)都好令人驚喜,菠菜麵蒸後仍然保持彈牙口感,而包住嘅脆玉瓜、蟹柳同魚肚都唔會過腍,雞扎係用單骨雞翼,而唔係一般嘅雞柳,都幾創新,成個雞扎味道較清淡,個人嚟講非常鍾意。
鮮蝦腸粉($69)有五嚿,上面都有五位美少女嘅圖案,又係打卡一流嘅點心!腸粉入口非常滑,蝦肉亦爽口彈牙,值得一試!


奶黃流沙包($59)雖然味道同一般茶樓嘅質素冇乜分別,但係勝在包上面印有露娜同阿提密斯嘅樣,如果大家係佢哋嘅粉絲,一定要嗌!
飲品方面,小妹同朋友分別嗌咗代表月野兔嘅蜜桃沙冰($49)同代表木野真琴嘅奇異果沙冰($49),兩杯沙冰上面都有新鮮果肉,蜜桃沙冰微甜充滿桃香,而奇異果沙冰就有薄荷糖漿點綴,飲落冰涼清新。


食完之後,店員仲會每人派角色扇仔一把同杯墊一個,有得食又有得拎贈品,Fans一定唔可以錯過呀!

店名:点心代表 Dim Sum Icon
電話:28851345
地址:尖沙咀彌敦道100號The ONE 3樓L308號舖
營業時間:星期一至日11:00 – 23:00

Blog:http://blog.ulifestyle.com.hk/blogger/shinysharon/
Facebook:https://www.facebook.com/hongkonggirl331

This entry was posted in 中國菜, 特色餐廳 and tagged , , , . Bookmark the permalink.