近期大熱嘅花花Cafe,喺日、韓、台都唔難搵到,但係有時假期唔多,得兩日一夜,又想去異地坐吓花花Cafe,Hea吓Relax吓,有一個地方一定啱你,就係澳門,一個鐘船就可以過馬交度吓假,而最最最重要嘅係,呢度竟然有間花花Cafe呀!點擊圖片放大 +3 過去嘅週末,小妹就同好閨密一齊去咗澳門Relax,發現呢間位於銀河酒店入面、名為「Cha Bei」嘅花花Cafe,由店外到店內都搵到唔少「花」嘅元素,令一眾少女心心眼。尤其係門外兩邊嘅花花牆,一邊係立體花牆,而另一邊係吊椅同鮮花區,文青得嚟又充滿少女情懷,簡直係神級打卡位。行入室內花蹤處處,每個角落都用新鮮花簇做裝飾,加上Tiffany藍、湖水綠同白色梳化櫈、原木枱同大理石枱,非常小清新風。 Setting超級靚 Welcome Drink係紅棗茶,特別為女仔而設 「縱情享受」下午茶($328/2人) 小妹同閨密特別試咗佢推出嘅首飾箱下午茶——「縱情享受」下午茶($328/2人),感覺非常驚喜!下午茶嘅主要鹹、甜點都係放喺一個大理石紋首飾箱入面,彷彿每一件小點都好似一件珠寶一樣,瑰麗雅緻。 酸忌廉煙燻三文魚青瓜紅菜頭三文治、雞蛋藜麥沙律三文治、黑松露炒雜菌法式包、牛油果多士。 首先盒嘅櫃桶放咗四款手指三文治同多士,比較特別嘅係「酸忌廉煙燻三文魚青瓜紅菜頭三文治」,麵包以天然嘅Super Food紅菜頭染成,配合酸忌廉、煙燻三文魚同青瓜,係傳統手指三文治嘅變奏。同樣用咗Super Food嘅「雞蛋藜麥沙律三文治」,Light得嚟又健康。另外仲有「黑松露炒雜菌法式包」同「牛油果多士」。 甜點 而鏡盒位置就放有「藍莓吉士醬修女泡芙」,食落雖然係好Full嘅吉士醬,但因為有微酸藍莓醬中和,令佢不致太甜膩。 「朱古力茶杯」就將朱古力慕絲、朱古力雪芳蛋糕、朱古力碎放喺曲奇餅整成嘅杯入面,造型特別得嚟,口感非常Rich。 仲有「Cha Bei招牌士多啤梨蛋糕」,用士多啤梨雪芳蛋糕夾住士多啤梨慕絲,食落酸酸甜甜,充滿莓果香氣。 仲有小妹最愛嘅「香檳水果果凍」,啫喱完全用香檳製成,每一啖都係香檳Bubbles幻化成嘅微醺感覺,非常適合愛酒之人。 另外仲有「覆盆子意式奶凍配洛神花茶」、「馬卡龍棒棒糖配麥牙糖餅棒棒糖」、「馬卡龍、紅唇朱古力戒指餅乾」、「雜果撻」、「自製棉花糖」,全部都係少女最愛嘅甜品。 當然仲有傳統小點「英式乾果鬆餅」同「焗瑪德蓮」,配埋Clotted Cream、士多啤梨果醬同自家製菠蘿果醬,食完就飽飽喇! 下午茶包埋精選茶、熱朱古力或咖啡,三百幾蚊兩個人可以坐成個下晝兼釋放吓少女心,都幾唔錯架! 66%熱朱古力 英式紅茶 後記 除咗下午茶,小妹其實都試咗佢嘅Set Lunch,由於小妹主要想食下午茶,加上又想喺度Hea時間,所以由1點幾已經開始坐,於是就同朋友Share一個Set Lunch。呢度嘅午餐一啲都唔貴,$108就可以揀一個前菜、一個主菜同一杯嘢飲,$138仲會多一個招牌甜品,性價比頗高。小妹試咗前菜「炸粟米蟹餅配牛油果芝士」同主菜「鱈魚排配蕃茄醬燉雜菜」,雖然份量唔多,但夠一個女仔食,而且味道都幾OK,加埋個花花靚景,都真係幾正。 炸粟米蟹餅配牛油果芝士 鱈魚排配蕃茄醬燉雜菜 而值得一讚嘅係,侍應態度極好,服務貼心,知道我同朋友Share一個Set Lunch,會主動畀多一Set茶杯我哋Share茶,唔使客人共飲一個茶杯或問佢拎多一隻杯咁尷尬,真係要畀多個Like佢! 店名:Cha Bei 電話:8883 2221 地址:路氹城「澳門銀河™」綜合渡假城1樓1047號舖 營業時間:星期一至四12:00-21:00,星期五12:00-22:00,星期六至日11:00-22:00 注意事項:不設訂位,先到先得 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331