唔講唔知,原來8月頭已經立咗秋,但小妹一啲涼意都感受唔到,反而覺得一日熱過一日,熱到就嚟溶咁濟。不過熱都有好處,就係大條道理食雪糕飲啤酒消暑,而尖沙咀有兩處就最啱大家假日去Hea吓,趁呢期仲熱緊,快啲約朋友去啦! (1)百味堂 近日最Hit一定係韓國雪糕品牌「百味堂」進駐香港尖沙咀K11,屎形雪糕(原味$48)一啲都唔核突,反而白雪雪令人忍唔住要咬一啖。雪糕嘅味道同一般韓式雪糕嗰種Creamy「重奶味」好唔同,佢嘅沙冰質感反而更清爽,令人食完唔覺自己會肥十磅,罪惡感極小,加上味道似足細細個生吞奶粉嗰個味 (相信細個無聊冇嘢食嘅小朋友一定試過,偷偷哋食奶粉),啲回憶即刻返晒嚟。店內外特設座位,大家可以舒舒服服坐喺度歎雪糕,消暑一番!點擊圖片放大 +3 店名:百味堂 地址:尖沙咀河內道18號K11購物藝術館地下中庭 _____________________________________________ (2)日本啤酒園「KIRIN ICHIBAN GARDEN 2017」 近年美麗華商場差唔多每年都會有一次麒麟啤酒活動,有啤酒飲又有嘢食,不知吸引幾多酒迷潮聖,今年小妹都去湊吓熱鬧,反正有的是時間。今年以夏日祭典為主題,唔單止有啤酒嘢食,仲有表演,當日小妹去嘅時候係素人歌手唱歌,所以氣氛令人好Relax。今年嘅Frozen Beer味道唔錯,果味啤酒有菠蘿味、血橙味同奇異果味,三款都偏甜,女仔會好鍾意,尤其係血橙味,似足汽水,係我嘅最愛。點擊圖片放大 +3 另外有經典麒麟一番榨啤酒同Stout黑啤,黑啤味濃帶咖啡味,但甜味欠奉,男仔會鍾意啲。小妹嗌咗一個「麒麟一番榨夏日套餐」($150),入面有齊以上講嘅5款口味啤酒,仲有日式七味粟米片。另外小妹又嗌咗「黑啤燴牛肋條」($60)同「日式燒汁雞軟骨」($50),配埋冰凍啤酒,同朋友一齊Share,又係一個消暑好Hea處!不過,呢個活動去到9月3號,想飲就要快喇!點擊圖片放大 「日式燒汁雞軟骨」($50) 「黑啤燴牛肋條」($60) 點擊圖片放大 +4 店名:日本啤酒園「KIRIN ICHIBAN GARDEN 2017」 日期:即日至9月3日 地點:尖沙咀Mira Place中庭 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331