其實澳門對於香港人嚟講一啲都唔陌生,年終可以去三五七次,皆因五星級酒店林立,而且每間酒店年年都有新搞作,去極都唔厭,今次小妹同一班好朋友離開香港,去澳門兩日一夜Hea吓叉吓電,完全哈使追景點,齋Hea遊,竟然畀我搵到啲特色小店,當然都唔會錯過啲出名嘅舖頭啦! 1)得意樽彩虹特飲@Macao Imperial Tea X OutLook 便攜式飲品其實唔係台灣人專利,澳門人一樣可以打造出屬於佢哋嘅獨特口味茶飲。呢間開喺新馬路大堂街嘅外帶茶飲店,以得意可愛嘅樽仔同色彩嬪紛嘅飲品做主打,吸引唔少澳門年輕人嘅支持! 其中一系列嘅彩虹飲品真係睇到小妹心心眼,就好似「遇見彩虹」,以士多啤梨、檸檬同藍柑調配成夏日沙冰,睇落好似彩虹,飲落又可以試晒唔同味道,最啱貪心嘅我!而好似海洋顏色嘅「藍柑物語」,就係以藍柑、檸檬同柑桔等調配而成嘅梳打水,飲落唔酸,甜甜哋又有柑桔香,勁Fresh!至於「邂逅櫻花」就係以士多啤梨、薄荷葉同食用櫻花調配出嚟梳打水,入面仲有一朵櫻花,非常浪漫,女仔實鍾意!如果鍾意情侶飲品,可以揀1314系列(一生一世),朋友嗌咗「13草莓寶寶」,以新鮮士多啤梨果肉、士多啤梨汁同益力多調配而成,甜蜜到呢,個小熊樽仔仲非常得意!其實佢嘅所有樽都可以拎走,洗乾淨後可以用嚟裝水或整Detox Water,環保又健康! 遇見彩虹 藍柑物語 邂逅櫻花 草莓寶寶 青瓜+火龍果 另外,由於係同 OutLook家品品牌合作,所以店內都有唔少由澳洲、日本、台灣等精選家品!點擊圖片放大 +2 店名:Macao Imperial Tea 新馬路店 x OutLook 家品店 地址:澳門大堂街平安大廈20號地下 電話:(853)6598 2921 __________________ 2)罐頭海鮮天堂@Loja das Conservas Macau 呢間舖係小妹Hea行嗰陣無意間發現,店仔細細,竟然放幾百款由國外入口嘅罐頭海鮮,有沙甸魚、吞拿魚、秋刀魚、青口、蜆... ...啲產品鋪滿晒店內嘅牆,而且全部都係葡國人最鍾意嘅油浸罐頭系列,所以各位掛住歐洲食物嘅朋友可以過澳門行一行,包你滿載而歸之餘,又可以解思「鄉」之苦!店內部份產品仲會有試食,各位朋友可以試啱先買!點擊圖片放大 +3 隨便試食 店名: Loja das Conservas Macau – Lcm澳門葡式辣魚店 地址:澳門新填巷9號(近新馬路北京水餃) 電話:(853)6571 8214 __________________ 3)自家製原隻雞蛋布甸@甜磨坊 如果你覺得喺氹仔食飽飽之後好口痕,但又唔想食啲Full嘢,可以試吓啲得意又唔覺飽嘅甜品,我講嘅就係位於氹仔美食區小巷嘅「甜磨坊」,店仔細細,竟然有自家製原隻雞蛋布甸,而且味道多元化,除咗原味之外,仲有朱古力味、抹茶味等,而且小店仲有支裝涼茶同支裝糖水出售,行到攰嚟攤頭吓都係唔錯嘅選擇,不過佢位置有少少隱閉,小妹都係無意間發現佢嘅存在,大家要食布甸嘅要花時間搵吓。 點擊圖片放大 +3 店名: 甜磨坊 地址:氹仔舊城區氹仔木鐸街67號地下 電話:(853)6326 8932 __________________ 4)必食手掌咁大豬排包@大利來記 講到豬排包,有邊個唔識大利來記?用秘製葡式醃料製成嘅豬排,結合用柴爐烤焙嘅麵包,成為咗每個到澳門旅行嘅人必食嘅美食,雖然近年好多人都話唔好食,但係口味嘅嘢真係見仁見智,計我話去澳門未食過豬排包,就好似冇去過澳門一樣,情況就好似英國嘅Fish & Chips其實冇咩特別,但你去到一樣會食,食只係旅行嘅一個標記,開心就好OK,何必咁認真? 除咗豬排包,仲有麵! 成隻手掌咁大呀 店名:大利來記 地址:澳門大三巴街25號地下B座 電話:(853)2836 6085 _________________ 5)氹仔膏蟹粥@誠昌飯店 講到蟹粥,新馬路有「皇冠小館」,氹仔有「誠昌飯店」,不過誠昌有樣好,就係有埋鑊氣小炒,比較適合鍾意叫餸食飯嘅人士,選擇較多。講到水蟹粥,大部份舖頭已經好少用水蟹,而係用膏蟹,貪佢多膏,煮出嚟嘅粥啖啖金黃色,令人垂涎。點擊圖片放大 +3 店名:誠昌飯店 地址:氹仔舊城區官也街28-30號 電話:(853)2882 5323/2882 7589