唔知大家幾耐冇同阿爸阿媽飲茶呢?就算個個星期日有去,係咪都係傳統茶樓一盅兩件?其實依家飲茶唔會咁獨沽一味,依家傳統蝦餃燒賣鳳爪雞包仔已經Out咗,而係玩味十足嘅點心,咁作為孝順仔女嘅你哋一定識做啦!呢間位於尖沙咀嘅餐廳,以得意點心做主打,啲點心唔單止食得,仲玩得,爸媽食完實冧! 「睇住流奶」($49) 如果你覺得流沙奶黃包嘅發明已達神級,咁呢個「睇住流奶」($49)就係N.0進化版,將奶黃包整成一隻公仔嘅頭,趁佢熱辣辣仲流心就喺佢個口嘅位置篤一個窿,然後輕輕一掐,啲奶黃就會由佢個口度「嘔」出嚟,好似嘔奶咁,超級搞笑! 「鴿吞鳳梨」($59) 以前啲人飲茶會撚雀,原來依家都會!呢味「鴿吞鳳梨」($59)就係模彷以前啲茶客嘅雀籠,將鳳梨酥變成一隻隻雀仔,每隻 Size都細過一隻麻雀,製作都幾花功夫,最「打耳」嘅係每隻都頭側側,十足傻仔,搞到我都唔捨得食佢落肚! 「小吃拼盤」($109/3款) 「小吃拼盤」($109/3款)可以自由選擇同配搭,A組揀2款,B組揀1款,啱晒鍾意試勻新嘢嘅Daddy Mommy。 橙棍冬瓜 「橙棍冬瓜」酸酸甜甜帶橙皮香,都幾開胃。 寶石蘭度 「寶石蘭度」其實係甘藍配紅石榴果,非常爽脆。 青瓜皮蝦 「青瓜皮蝦」係青瓜捲住經調味嘅蝦肉,係一味清新爽甜嘅前菜。 「布拉蝦腸」($59) 「炒蝦腸粉」($69) 「布拉蝦腸」($59)加咗幾粒三文魚子,究竟係日式定中式呢?至於「炒蝦腸粉」($69)個味就好似港式乾炒牛河,值得一試! 睇到呢度,係咪好有衝動喺今個周末帶住爸媽去「飲茶」呢?點擊圖片放大 店名:飲茶(Yum Cha) 電話:2751 1666 地址:尖沙咀加連威老道20-22號3樓 營業時間:星期一至日: 11:30-15:00, 18:00-23:00