話說小妹有成年冇去過葵涌廣場,最近聽到好多Blogger朋友分享嗰度有好多大件夾抵食嘅特色美食,為食嘅我即刻化身「餓底」,親身直擊到底係咪真係咁正! 1)半板海膽手卷 葵涌廣場最近最Hit嘅一定係半板海膽手卷,不過最吸引嘅唔係海膽,而係以貼地價$30食到半板海膽!聽落好似好抵咁,但諗深一層又會巧驚驚,$30嘅質素會去到邊?會唔會係劣食?小妹試咗三間以半板海膽做招徠嘅外賣手卷店,睇吓佢哋係咪真心又平又正! 壽司安日式料理 主打各式手卷同丼物嘅壽司安,推出$29半板海膽手卷,價錢係三間之中最平,海膽份量足足有成四排(正常一板海膽約8至9排)!份量多但冇乜海水味,微苦而鮮甜度不足,每瓣海膽不夠清晰分明,部份已變糊狀。 店名:壽司安日式料理 地址:葵芳葵富路7號葵涌廣場2樓2002號舖 電話:9320 9569 營業時間:星期一至日: 12:00-22:30 ********************************************************************************** 問卷手卷專門店 專賣手卷,$35一份,三間之中最貴,Sell半板海膽但實際上不足半板,只有兩排鋪面,但每瓣海膽都清晰分明而且大塊,食落鮮甜有海水味。點擊圖片放大 +2 店名:問卷手卷專門店 地址:葵芳葵富路7號葵涌廣場地下A48B號舖 電話:6027 7838 營業時間:星期一至日: 11:00-21:00 ********************************************************************************** 大滿足 大滿足激推30幾款手卷,睇到花多眼亂,$29.99($30)價錢合理,海膽足有五排,簡直多過半板!每瓣海膽清晰分明,雖然大小參差但味甜回甘有海水味,個人認為三間之中最佳。 大家可以睇吓半板海膽嘅份量 店名:大滿足 地址:葵芳葵富路7號葵涌廣場2樓潮流廊2009號舖 電話:3188 3788 營業時間:星期一至日: 11:30-22:00 除咗海膽手卷,其他美食一樣吸引!!! 2)鮮果雪糕班戟 「又一戟」喺葵涌廣場開舖多年,一直係鎮「場」之寶,店前永遠人山人海,原因係即叫即整嘅班戟香甜鬆軟,包住新鮮水果粒同自家製雪糕,再加香滑忌廉,味道真係Oishi!不過提提大家,由於係即叫即整,加上捧場客超多,快則等15分鐘,慢則(人多時)可能等半個鐘,所以千祈唔好喺好肚餓嘅時候買,如果唔係餓暈咗都唔知咩事。 芒果+雪糕班戟$26 士多啤梨+雪糕班戟$27 店名: 又一戟 地址:葵芳葵富路7號葵涌廣場3樓 ********************************************************************************** 3)芝士粟米公仔麵 「名星小店」嘅芝士公仔麵真係一絕,原因無他,成碗麵都淋滿芝士醬,食完真係罪孽深重!小妹怕太「漏」,所以加咗粟米去除膩感! 芝士粟米公仔麵$24 店名: 名星小店 地址:葵芳葵富路7號葵涌廣場1樓B01B號舖 營業時間:星期一至日: 12:00-21:00 ********************************************************************************** 4)台式炸雞塊 「繼光香香雞」嘅炸雞堅持即叫即炸,每位客人絕對可以食到熱辣辣、脆卜卜嘅炸雞,加上可以揀唔辣、小辣、中辣同大辣,啱晒唔同人嘅口味!而且炸粉唔會太厚,啖啖都係雞肉。 店名: 繼光香香雞 地址:葵芳葵富路7號葵涌廣場3樓303A號舖 電話:2595 9009 營業時間:星期一至日: 14:00-20:00 ********************************************************************************** 5)咖喱魚蛋 「串燒之王」嘅名來自舖頭熱賣嘅串燒,不過小妹覺得佢嘅咖喱魚蛋更出色,魚肉加陳年果皮打成魚蛋,再淋上香辣杰身咖喱汁,每粒魚蛋都掛上香濃汁醬,惹味到想喊! 點擊圖片放大 店名: 串燒之王 地址:葵芳葵富路7號葵涌廣場地下25A 電話:2426 8120 ********************************************************************************** 6)鹽水雞 如果掛住台灣嘅鹽水雞,「ET鹽水雞」絕對可以解你相思之苦,以一人前為例,可以任揀一款雞胸肉、雞髀肉或3隻雞翼,再揀3樣配菜,已經好夠食!雞肉鮮嫩Juicy,再加上有成30幾種配菜任你揀,加埋蔥、蒜同辣椒粉,又係一款惹味之作! 價目表 $42(1人)任揀一款雞胸肉、雞髀肉或3隻雞翼+3款配菜 $72(2-3人)半隻雞+3款配菜+招牌洋蔥 $109(3-4人)2隻雞胸+1隻雞髀+3隻雞翼+4款配菜 $142(4-6人)1隻雞+6款配菜+招牌洋蔥 店名:台灣ET鹽水雞 地址:葵芳葵富路7號葵涌廣場地下A76號舖 電話:6841 2843 營業時間:星期一至日: 12:30-20:30 ********************************************************************************** 7)慧食貓 主打手抓餅,都係即叫即整,蜜桃煙鴨胸手抓餅($24)經常售罄,不可不試! 店名:慧食貓 地址:葵芳葵富路7號葵涌廣場B01C舖 電話:6586 6386 ********************************************************************************** 8)綜合豆花 開咗冇幾耐嘅「豆花先生」每日下晝5點先開門,但唔夠4點半已大排長龍,小妹試咗綜合招牌豆花($28),感覺冇咩特別,黑糖糖水味道偏淡,惟一值得讚嘅係芋圓同地瓜圓用料童叟無欺,食嘅時候真係食到芋頭同蕃薯纖維,卻略欠Q彈,不值得排咁耐隊食! 店名: 豆花先生 地址:葵芳葵富路7號葵涌廣場2樓2012號鋪 電話: 豆花先生 營業時間:星期一至日: 12:00-22:00